Ekki brenna út á að­ventunni

Hjá sumum er meira að segja allt á hvolfi í vinnunni og vinnudagarnir jafnvel langir.

Við bætist allt hitt:

• Jólaþrifin
• Jólabakstur
• Jólajafalisti allra (liggur hann fyrir?)
• Jólagjafakaup
• Jólafatakaup
• Jólainnpökkunin
• Jólasamvera með vinum, vandamönnum og/eða vinnufélögum
• Jólasamvera barnanna okkar; skutl, samvera, undirbúningur
• Og svo mætti lengi telja.

Álagið sem þessu fylgir getur líka aukið á kvíða eða áhyggjur;

• Næ ég að gera þetta allt?
• Eigum við pening fyrir öllu sem þarf?
• Sumir upplifa truflun á svefni
• Fleira.

Að sama skapi er þetta svo sannarlega tími sem við viljum njóta sem mest og best. Til þess að það sé hægt, fylgja nokkur góð ráð:

1. Þriðja vaktin: Hver sér um hvað?

Ef það er einhvern tíma góður tími fyrir pör að ræða saman um þriðju vaktina, þá er það einmitt í aðdraganda jóla.

Að fara sameiginlega yfir það sem þarf að gera og skipta á milli okkar verkum eða ákveða hvað er gert saman og svo framvegis, er af hinu góða og um að gera að reyna að ná þessu spjalli á góðu nótunum og með það að leiðarljósi að allir á heimilinu nái að njóta aðventunnar sem best.

Við erum jú í sama liði…

2. Jólastússið og dagskráin

Eitt sem er líka mikilvægt að gera, er að búa til tíma fyrir það sem við ætlum okkur að gera.

Því oft aukum við á stressið okkar vegna þess að við ætlumst til þess að ná að gera svo ofboðslega margt í desember, til viðbótar við annað annríki; vinnu, heimilishald, uppeldi og svo framvegis.

Til að njóta aðventunnar og jólanna sem best, er því gott að velta fyrir sér; Hvenær er best að gera það sem þarf að gera og þarf ég að færa þá eitthvað annað til í staðinn eða sleppa?

Því það að vera langt frameftir á kvöldin í stússi en mæta síðan næsta dag í vinnu og standa þar vaktina daglangt en dauðþreytt er í rauninni engin lausn.

3. Jólaegóið í burt

Gott er að fara yfir verkefnin sem við erum að setja okkur og rýna svolítið í það hvort þau eru fyrir alvöru öll mjög nauðsynleg eða í samræmi við gildin okkar.

Dæmi:

Ef við erum að vinna mjög mikið í desember en ætlum okkur líka að gera allt hitt; þar með talið að klára hin frægu jólaþrif og baka margar tegundir af smákökum, hversu mikilvægt er að við gerum það, höfum við tíma til að gera þetta í gleði eða erum við að ætla okkur um of vegna þess að egóið okkar vill að við séum að ná þessu? (allt spikk og span heima fyrir og sjö sortir af smákökum til að segja frá í vinnunni…)

Annað dæmi gætu verið jólagjafirnar og verð:

Erum við að kaupa og gefa dýrari jólagjafir en við höfum í raun efni á til þess að búa til einhverja ásýnd um að þykjast eiga meiri pening en við eigum? Ef þetta egó er að tala til okkar, gæti verið ágætt að horfa frekar á gildin okkar, sem til dæmis er líklegt til að segja; Það er mikilvægara að njóta samverunnar og tímans, frekar en að þykjast eiga eða vera meir en við erum og vera síðan hálf andvaka á kvöldin vegna þess að jólastreitan er að taka til sín.

Næst er síðan að setja okkur mörk og taka ákvörðun um það hvaða verkefni það eru í raun, sem eiga fyrir alvöru að fara á verkefnalistann fyrir aðventu og jól.

4. Jólagleðin

Enn eitt atriðið er að sjá fyrir okkur og ræða það jafnvel við makann okkar eða nánustu vini, hvernig við viljum njóta aðventunnar og jólanna sjálfra;

• Hvernig langar okkur að líða?
• Viljum við upplifa gleði og tilhlökkun?
• Njóta daganna úthvíld?

Með því að huga aðeins að líðaninni okkar, sjá fyrir okkur hvernig okkur langar að dagarnir séu og segja það helst upphátt við einhvern sem við treystum, erum við líklegri til að gera yfirfarið öll verkefni aftur og rýnt í það á ný, hvort við séum enn að keppast við að gera eitthvað sem mögulega fær okkur til að auka á kvíða. Eða einfaldlega að brenna út fyrir jólin….