„En við getum aldrei talað um að hann sé að gera þetta fyrir vin sinn“

Heimildin vitnaði á mánudag í leynilegar upptökur af Gunnari Bergmann Jónssyni, syni Jóns Gunnarssonar og fyrrverandi hrefnuveiðimanni, þar sem hann ræddi við erlendan mann sem sigldi undir fölsku flaggi. 

Maðurinn lést vera fjárfestir sem væri áhugasamur um fasteignaviðskipti en var í raun útsendari fyrirtækis sem sérhæfir sig í upplýsingaöflun, stundum með óheiðarlegum aðferðum, sem Heimildin sagði að ónefnd alþjóðleg samtök sem eru andsnúin hvalveiðum hefðu ráðið til verksins.

Tálbeitan fékk Gunnar til þess að ræða um hvalveiðar á Íslandi, aðkomu föður síns að þeim og nána vináttu við Kristján Loftsson, forstjóra og stærsta eiganda Hvals hf. Jón hafði þá tekið stöðu aðstoðarmanns Bjarna Benediktssonar, starfandi forsætisráðherra, í matvælaráðuneytinu eftir að hann tapaði öðru sæti á framboðslista flokksins í Suðvesturkjördæmi til Þórdísar Kolbrúnar Reykfjörð Gylfadóttur, utanríkisráðherra og varaformanns flokksins, í síðasta mánuði.

Í upptökum af samtali Gunnars og tálbeitunnar sem Vísir fékk á miðvikudag lýsir Gunnar því að Jón hafi fallist á ósk Bjarna um að taka fimmta sæti á lista Sjálfstæðisflokksins gegn því að fá starf og að fyrir honum vakti að gefa aftur út leyfi til hvalveiða eftir að ráðherrar Vinstri grænna stöðvuðu veiðarnar.

Tálbeitan heyrist lýsa aðdáun á að Jón ætlaði sér að ganga frá leyfunum fyrir vin sinn fyrir kosningarnar í lok nóvember.

„Já, en við getum aldrei talað um að hann sé að gera þetta fyrir vin sinn,“ heyrist Gunnar segja á ensku í myndbandinu að neðan.

Mun gefa út ný leyfi

Gunnar fer yfir aðdraganda þess að Jón tók stöðu aðstoðarmanns Bjarna í matvælaráðuneytinu eftir að Vinstri græn gengu út úr ríkisstjórnarsamstarfinu og Jón missti sæti sitt á framboðslista Sjálfstæðisflokksins. Bjarni hafi gengið á eftir Jóni að taka sæti neðar á listanum.

„Á endanum sagði hann: „Allt í lagi, ég er tilbúinn að taka fimmta sætið en þú verður að gera svolítið fyrir mig. Ég verð að fá einhvern pall (e. platform),“ heyrist Gunnar segja við tálbeituna um það sem Jón hefði sagt við Bjarna.

Það fyrsta sem Jón hafi gert í ráðuneytinu hafi verið að segjast ætla að ganga frá hvalveiðileyfum.

„Vinstri flokkarnir eru að ganga af göflunum yfir því að Jón sé að fara vera fylgjandi hvalveiðum eða gefa þeim leyfi næstu fimm árin og hann mun gera það,“ segir Gunnar sem telur að föður sínum takist að leyfa hvalveiðar aftur, jafnvel þótt það verði hans síðasta verk í stjórnmálum.

Konurnar í flokknum ósammála Jóni

Þótt Gunnar segi að líklega sé allt að tveggja mánaða svigrúm eftir kosningar til þess að ganga frá leyfunum vilji faðir sinn gera það fyrir kjördag.

„Hann vill gera þetta fyrir kosningarnar en sumir, sérstaklega konurnar og stelpurnar í flokknum hans eru ekki sammála honum. En ég held að honum takist það.“

Þetta brot úr samtalinu má heyra í klippunni að neðan.

Þá lýsir Gunnar því að Bjarni forsætisráðherra geti ekki sjálfur afgreitt hvalveiðileyfi vegna fjölskyldutengsla við ónefnda eigendur Hvals hf. Það gæti því komið í hlut Þórdísar Kolbrúnar utanríkisráðherra að skrifa undir ákvörðun um veitingu leyfanna.

Tálbeitan spyr þá hvort að utanríkisráðherrann sé líka „vinur“.

„Nei, en í sama flokki þannig að við verðum að treysta á það,“ segir Gunnar.

Bjarni sagði í vikunni að hann hefði rætt við utanríkisráðherra að mögulega koma að málinu. Að athuguðu máli hefði komið í ljós að hann væri hæfur til að taka ákvörðun um hvalveiðileyfi.

Jón hafi greitt fyrir flugið en ekki annað

Talið berst einnig að þingi Alþjóðahvalveiðiráðsins sem fór fram í New York í september. Gunnar segir að Kristján Loftsson hafi beðið Jón um að koma með sér þangað.

„Þannig að hann fór og auðvitað borgaði faðir minn flugið til New York. Afgangurinn af ferðinni var ekki greiddur af honum,“ segir Gunnar brosandi.

Jón skrifaði í Facebook-færslu á sínum tíma að hann hefði sjálfur greitt allan kostnað við ferðina til New York eftir að þáverandi matvælaráðherra, Bjarkey Olsen Gunnarsdóttir, hefði hafnað bón hans um að vera hluti af sendinefnd Íslands. Jón var fulltrúi samtakanna International Union for Conservation of Nature (IUCN) sem beita sér meðal annars fyrir sjálfbærri nýtingu auðlinda.

Endurtók Jón í yfirlýsingu sem hann sendi frá sér áður en umfjöllun Heimildarinnar birtist á mánudag að hann hefði sjálfur staðið straum af kostnaði við ferðalagið.

Ferðin kemur ekki fram í hagsmunaskrá Jóns á Alþingisvefnum. Í skriflegu svari frá skrifstofustjóra Alþingis við fyrirspurn Vísis kemur fram að hún hefi ekki upplýsinga um ferðina.

Sonurinn verið að reyna að heilla svikahrappinn 

Bjarni Benediktsson forsætisráðherra hefur hafnað því að um einhvers konar kaup kaups hafi verið að ræða. Hann hafi einfaldlega beðið Jón um að aðstoða hann í matvælaráðuneytinu. Í síðustu viku beindi Bjarni þeim tilmælum til ráðuneytisstjórans að Jón kæmi ekki nálægt hvalveiðileyfum.

„Sonur minn er venjulegur fjölskyldufaðir í rekstri, sem eyddi mörgum vikum í að eltast við gylliboð svikahrapps sem engin innistæða var fyrir. Í þeim samskiptum lagði hann mikið á sig til að heilla hinn meinta fjárfesti og tryggja viðskiptin, en fór rangt með í einhverjum málum sem þar voru til umræðu,“ sagði Jón í fyrrnefndri færslu á Facebook.

Þá nefndi hann að sem aðstoðarmaður hefði hann engar heimildir til að hlutast um veitingu hvalveiðileyfa.