„Undir niðri kraumar bullandi rígur“

Gummi Ben spurði þjálfara og fyrirliða liðanna út í þennan mikla ríg og þá staðreynd að hin eitilharða samkeppni á milli þeirra geri viðureignir Víkings og Breiðabliks að hápunktum hvers sumars - hvað þá þegar þau mætast í einum leik upp á sjálfan Íslandsmeistaratitilinn eins og á sunnudag.

„Þetta var bara íþróttalegur ágreiningur,“ sagði Arnar Gunnlaugsson, þjálfari Víkinga, í þátíð til að byrja með og vildi meina að hlutirnir hefðu aðeins róast eftir að Óskar Hrafn Þorvaldsson steig frá borði hjá Blikum á síðasta ári. Halldór Árnason, fyrrverandi aðstoðarmaður Óskars og nú þjálfari Blika, væri rólegri.

Hlegið þegar Arnar sagðist orðinn þroskaðri

„Bæði lið voru að sækja að sama markmiði – að vera á toppnum og vinna dollurnar. Þá skapast náttúrulega rígur; þjálfararnir tóku þátt í þessu, leikmennirnir og áhorfendur. Úr varð hin alls herjar skemmtun sem ég ætla að vona að endi ekki með einhverjum hápunkti á sunnudaginn, heldur verði áframhald af þessu.

Þetta eru tveir bestu klúbbarnir í dag og hafa verið að berjast um titlana undanfarin ár. Svo bætist við árangur í Evrópukeppni. Þetta er bara gaman. Þetta er „show business“. Við erum að reyna að standa okkur, og þurfum líka að standa okkur til að auglýsa íþróttina okkar. Stundum förum við fram úr okkur, ég viðurkenni það, en ég held að almennt hafi vel tekist til. Fólk hefur gaman af þessu. Núna er þetta aðeins rólegra. Dóri er rólegri en Óskar, og ég er orðinn þroskaðri,“ sagði Arnar en þá gat Gummi Ben reyndar ekki orða bundist og benti á að Arnar væri nú reyndar í leikbanni á sunnudaginn, og uppskar hlátur Arnars og annarra á fundinum. Sölvi Geir Ottesen stýrir Víkingum í hans stað á sunnudaginn.

Gera hvað sem er til að vinna þessa dollu

„Þetta er farið að líkjast aðeins eðlilegra ástandi en undir niðri kraumar bullandi rígur og báðir aðilar eru tilbúnir að gera hvað sem er til að vinna þessa dollu á sunnudaginn,“ sagði Arnar eins og sjá má í klippunni hér að neðan.

Halldór hélt sig frá banni

Halldór Árnason, sem er einum sigri frá því að verða Íslandsmeistari í fyrstu tilraun sem aðalþjálfari í efstu deild, var reyndar einnig einu gulu spjaldi frá því að vera í leikbanni á sunnudaginn:

„Ég var meðvitaður um að ég væri á þremur spjöldum. Ég er búinn að vera það svolítið lengi. Búinn að standa mig vel að hanga á þessum þremur,“ sagði Halldór léttur.

Ekki það sama óvinur og keppinautur

Höskuldur Gunnlaugsson, fyrirliði Blika, segir ríginn á milli Blika og Víkinga hafa gert Bestu deildinni gott.

„Þetta hefur verið ótrúlega gaman og það er ekki sjálfgefið sem leikmaður að fá að eiga hörkukeppinaut. Sumir setja samasemmerki á milli þess að vera óvinur og keppinautur. Óvinur er kannski einhver sem þú vilt ráða af dögum en þetta er ekki alveg þar. Alla vega ekki alltaf,“ sagði Höskuldur og glotti.

„En það eru forréttindi fyrir leikmenn og klúbbinn að eiga hörkukeppinaut. Þetta er líka, eins og Arnar segir, „show business“ og ég held að deildin í heild hafi notið góðs af þessu [rígnum]. Þetta hefur verið meiriháttar gaman,“ sagði Höskuldur.

Alltaf skemmtilegir og spennandi leikir

Gummi tók undir þetta og sagði leiki liðanna einfaldlega bestu auglýsinguna fyrir deildina.

„Þetta eru tvö bestu liðin að mæta hvort öðru, og þá fylgir bara aðeins meira aksjón og menn vilja fara meira hver í annan. Þetta eru alltaf skemmtilegir leikir og þessir leikir við Blika hafa líka verið ógeðslega spennandi,“ sagði Nikolaj Hansen, fyrirliði Víkinga, en hægt er að horfa á fundinn í heild sinni í greininni hér að neðan.

Leikur Víkings og Breiðabliks fer fram á Víkingsvelli klukkan 18:30 á sunnudaginn og verður sýndur beint á Stöð 2 Sport. Upphitun fyrir leikinn hefst klukkan 17:45. Eftir leikinn verður Besta deild karla svo gerð upp í lokaþætti Stúkunnar.