Sögu­legur fundur á Bessa­stöðum og á­takan­leg saga af Stuðlum

Alma Möller landlæknir hefur bæst í fjölmennan hóp frambjóðenda fyrir alþingiskosningar í næsta mánuði. Víða er útlit fyrir harða baráttu um sæti á lista. Við förum yfir helstu slagi sem væntanlegir eru í kvöldfréttum.

Piltur sem hefur verið sendur sextán sinnum á Stuðla á einu ári segir betrun þeirra sem fara þangað inn litla sem enga. Faðir hans kallar úrræðið geymslu fyrir börn í vanda þar til þau verða átján ára.

Aðdáendur One Direction-stjörnunnar Liam Payne eru harmi slegnir eftir að fregnir bárust af sviplegu andláti hans á hóteli í Buenos Aires í gær. Hótelstjóri sem hringdi á neyðarlínuna skömmu fyrir andlátið sagði að æði hefði runnið á söngvarann og óttast væri að hann færi sér að voða. Við förum yfir málið í kvöldréttum.

Þá verðum við í beinni útsendingu frá undirbúningi Scooter-tónleika sem haldnir verða á morgun. Í sportpakkanum sýnum við frá fyrstu skóflustungu að nýjum Laugardalsvelli. Og í Íslandi í dag heimsækir Vala Matt Hollywood-stjörnu, sem vann sig út úr vítahring átröskunar og starfar nú sem heilari.