„Lífs­stíllinn er að drepa okkur“

Númi er gestur í nýjasta hlaðvarpi Sölva Tryggvasonar og þar segir hann hraðann á Íslandi gríðarlegan. Við séum hreinlega að drepa okkur á óhollum lífsstíl. Númi segir að nýleg ferð hans og fjölskyldunnar til Costa Rica hafi breytt lífsviðhorfum sínum. Konan Núma heitir Elín Jónsdóttir og þau eiga þrjú börn saman sem eru öll á grunnskólaaldri.

Tímabært að aftengja

„Okkur langaði númer eitt tvö og þrjú bara að taka allt úr sambandi. Ekki síst fyrir krakkana okkar. Að hverfa, tengjast og vera í náttúrunni. Og hvað er þá betra en að fara bara inn í frumskóginn eins langt frá því sem við þekkjum og mögulegt er.“

Númi segir ferðina hafa verið mikla upplifun. Þau bjuggu í litlu húsi í skóginum með apa, fugla og skordýr allt um kring.

„Þar vorum við hluti af samfélagi þar sem allir hjálpast að til að geta búið þarna. Krakkarnir fóru í skóla og við vorum að vinna hluta af deginum og svo voru alls konar uppákomur, listsköpun og fleira.

Það er erfitt að útskýra það sem við upplifðum þarna, en það var magnað að vera inni í frumskóginum og vakna upp við dýrahljóðin á hverjum degi og taka 40 mínútur á hverju kvöldi í hugleiðslu og tengingu við dýralífið og náttúruna.“

Menningjarsjokk að koma aftur til Íslands

Að koma heim hafi svo verið áfall.

„Við fengum menningarsjokk þegar við komum heim. Það er svo mikill hraði á Íslandi, efnishyggja og keyrsla. Fólk er að mínu mati oft að elta eitthvað sem það veit ekki einu sinni hvað er. Brynjan hjá mörgum er orðin mjög þykk í þessu efnishyggjukapphlaupi, en innst inni viljum við öll bara vera séð, heyrð og snert.”

Númi hefur sterkar skoðanir á því sem er að gerast í samfélaginu okkar, ekki síst eftir að hafa starfað í áraraðir við að hjálpa fólki með heilsu:

„Ég vil ekki vera neikvæður eða vera með boð og bönn, en við erum á svo margan hátt á rangri leið. Mér finnst þetta fyrst og fremst snúast um börnin okkar. Hver ætlar að taka við þegar við föllum frá? Er eðlilegt að við séum að fóðra krakka undir 10 ára og auðvitað unglinga líka með sykurlegi, gervimat, orkudrykkjum og aukaefnakokteilum? Svo erum við komin með lyfin inn þegar þau eru 5-6 ára gömul.“

Tvítugir karlmenn í dag þurfa Viagra til að geta stundað kynlíf! Mér finnst þetta „scary“ þróun og eitthvað sem við verðum að tala um og gera eitthvað í.

Þetta þarf ekki að vera svona. Númer eitt, tvö og þrjú er að við verðum að breyta innkaupakörfunni okkar. Breyta því hvað við setjum í líkama okkar. Hvort sem það er öll þessi ruslfæða, orkudrykkir, snus-pokar, wape eða annað. Þetta er að drepa okkur. Spurningin er hvort og hvenær við ætlum að vakna upp úr dáleiðslunni sem við erum föst í,“ segir Númi Snær.

Neyddist til að endurskoða ýmislegt í sínu lífi

Númi Snær breytti um takt fyrir nokkrum árum eftir að hafa verið kominn langt í Crossfit ásamt því að reka fjölskyldu og fyrirtæki. Hann hefur undanfarin ár einbeitt sér að heildrænni nálgun þegar heilsan er annars vegar:

„Ég lenti á botninum. Hvort sem við köllum það „bur­nout“ eða eitt­hvað annað, þá var hraðinn á mér búinn að vera allt of mikill. Ég var búinn að æfa tvisvar á dag nánast allt mitt líf og svo var ég að læra, eignast börn og að reka fyrir­tæki. Þetta var bara of mikið og ég náði engum tíma fyrir mig og var eiginlega bara hættur að geta andað. En það er kannski ekki nema von að maður fari í þessa átt miðað við skil­yrðingarnar. Manni hefur bara verið kennt að vera karl­maður, slá í borðið og drekka meira kaffi og halda á­fram og ég var alltaf bara þannig.“

Númi segist hafa neyðst til að endurskoða ýmislegt í sínu lífi eftir tímabilið í Costa Rica. Það hafi opnað augu hans; hann átti ekki annan kost en hægja verulega á sér. Um leið opnuðust augu hans fyrir því hversu stór hluti Ís­lendinga sé fastur í streitu­á­standi.

„Við gefum okkur fæst tíma og rými til að hægja á okkur og spyrja okkur hvort við séum að gera það sem við viljum gera í lífinu og hvort við séum að fara í rétta átt? Tilhneigingin er að halda bara áfram að hlaupa án þess að vita hvert maður er að fara. En staðreyndin er sú að það er býr mikil viska í kyrrðinni og þar fær maður svörin. Það er mikil­vægt að jarð­tengja sig reglu­lega, ná að hlusta á inn­sæið og gefa sér rými. Svörin eru öll innra með okkur og líkaminn er stórkostlegt tæki sem kann að heila sjálfan sig ef við hlustum almenni­lega á hvað hann er að reyna að segja okkur.“

Menn huga ekki að heilsunni fyrr en komið er í óefni

Nútíminn býður hins vegar upp á áreiti sem er allt of mikið. Líkaminn fari úr jafn­vægi með alls konar áráttukenndri hegðun varðandi mat og annað. Þá endi það bara með því að við séum einfald­lega hætt að leyfa líkamanum að vinna sína vinnu í friði.

Númi sér það oft í störfum sínum að fólk setur ekki heilsuna í forgang fyrr en það er orðið örvæntingarfullt. Hann veltir því upp hvort við getum ekki tekið ákvörðun um að forgangsraða heilsunni áður en allt er komið í óefni:

„Við endum flest á að átta okkur á því að við þurfum að koma okkur út í náttúruna, borða náttúru­legan mat og hægja á okkur. En því miður gerist það oft ekki fyrr en allt of seint. Hefur þú prófað að vera ekki með ristil? Eða vera með krabbamein? Þegar staðan er orðin þannig er mjög augljóst að það er bara eitt forgangsatriði og það er að ná heilsu. Við ættum að átta okkur á því að við eigum bara einn líkama og bara eina heilsu sem ætti í raun að vera alltaf í forgangi.“

Hægt er að nálgast viðtalið við Núma og öll viðtöl og podköst Sölva Tryggvasonar inni á solvitryggva.is