Fólk kveiki á kerti til minningar um Bryn­dísi Klöru

„Ég fékk þessa hugmynd og fann að mig langaði að koma henni út. Ég er venjuleg móðir og þessi atburður sló mig, eins og aðra. Mér finnst þetta vera falleg leið. Með kærleikann að vopni,“ segir Anna Björt og að hún upplifi mikinn vanmátt og gríðarlega sorg.

„Þess vegna vildi ég gera eitthvað til þess að hjálpa þótt ég viti að ekkert í heiminum mun bæta þá sorg sem fjölskylda og nánustu aðstandendur þessarar ungu stúlku standa frammi fyrir.“

Hún segir að með framtakinu vilji hún aðstoða fólk við að finna tilfinningum sínum farveg og vekja samfélagið til umhugsunar um hvernig sé hægt að lágmarka hættu á að slíkur atburður endurtaki sig.

Fólk leyfi kertinu að loga á útfarardaginn

Anna Björt vill taka fram að hún hefur engin tengsl við fjölskyldu Bryndísar Klöru en fékk hugmyndina vegna þessa sorglega atburðar á Menningarnótt og að hennar mati þeirrar alvarlegu stöðu sem samfélagið stendur frammi fyrir vegna algengi hnífaburðar og auknu ofbeldi meðal ungs fólks. Hún hefur ráðfært sig við prest fjölskyldunnar til að upplýsa um framtakið.

„Ég vona að við bregðumst öll vel við þessu framtaki með kaupum á kerti og leyfum því að loga fyrir Bryndísi Klöru úti á stétt heima hjá okkur eftir sólsetur á sjálfan jarðarfarardaginn. Ég held að þjóðfélagið okkar þurfi einhver verkfæri til þess að votta samúð sína og sýna samstöðu gegn þessari þróun ofbeldis og mér finnst þetta falleg leið til þess,“ segir Anna Björt sem tekur jafnframt fram að hún eigi engra hagsmuna að gæta.

Kertin verða til sölu í Bónus, Krónunni, Nettó, Hagkaup og Kjörbúðinni. Anna Björt segir fólk að sjálfsögðu einnig geta kveikt á sínu eigin kerti og leggja sjóðnum lið með öðrum hætti.

Tilgangur sjóðsins er að styðja við verkefni sem miða að því að vernda börn gegn ofbeldi og efla samfélag þar sem samkennd og samvinna eru í forgrunni. Hægt er að millifæra beint inn á reikning minningarsjóðsins, 0515-14-171717, kennitala 430924-0600.