Söfnuðu nærri tveimur milljónum til minningar um Pétur Ben

Á dögunum fór fram leikur Augnabliks og Hvíta Riddarans í 3. deld karla í knattspyrnu hér á landi. Þar söfnuðust alls 1.777.600 krónur. Í tilkynningu Píeta segir að samtökin séu „orðlaus“ og vilji þau „þakka  Augnablik kærlega fyrir þessa rausnarlegu gjöf.“

Ásamt fjármunum þá fylgdi með skjal þar sem útlistað var af hverju Augnablik vildi standa að söfnunni og hvað Píeta samtökin þýða fyrir knattspyrnufélagið.

„Karlalið Augnabliks þakkar Píeta samtökunum fyrir öflugt og gott samstarf í tengslum við fótboltaleik Augnabliks og Hvíta Riddarans í 3.deild karla þar sem við minntumst Péturs Benediktssonar, en hann kom að endurvakningu Augnabliks 2006.

Sama dag og leikurinn var leikinn 12.júlí 2024 hefði Pétur orðið fertugur. Vildi Augnablik nota þau tímamót til að skapa umræðu um sjálfsvíg og vekja athygli á frábæru starfi Píeta samtakanna. Leikurinn var vel sóttur og spilaði Augnablik í sérstökum minningartreyjum sem voru einnig til sölu og seldust upp á örskots stundu.“

Vísir ræddi stuttlega við Ara Stein Skarphéðinsson, gjaldkera Augnabliks, um leikinn, söfnunina og leikinn gegn Hvíta Riddaranum.

„Benedikt Þór (Guðmundsson, faðir Péturs) heyrði í okkur þegar hann sá að það var leikur hjá okkur á því sem hefði verið afmælisdagurinn hans Péturs. Hann spurði einfaldlega hvort við ættum ekki að gera eitthvað skemmtilegt og við héldum það nú,“ sagði Ari Steinn og tók fram að fjölmargir vinir Péturs hefðu nú verið í kringum Augnablik undnafarin ár ásamt því að Pétur þjálfaði marga af yngri leikmönnum liðsins þegar þeir voru yngri.

Eftir að velta því fyrir sér hvernig væri best að heiðra minningu Péturs var á endanum ákveðið að leikurinn yrði í raun „minningarleikur til heiðurs Péturs á sjálfan afmælisdaginn þar sem planið var að spila í sérstökum afmælisbuningum sem við létum hanna ásamt því að selja þá til að safna pening fyrir Píeta samtökin.“

Allur ágóði leiksins, hvort sem var búningasala eða miða- og veitingasala, rann óspart til Píeta en Pétur féll fyrir eigin hendi árið 2006. Faðir hans kom svo að stofnun Píeta samtakanna árið 2018.

Ari Steinn sagði viðtökurnar svo hafa verið vonum framar. Alls hafi verið pantaðar 100 treyjur sem allar seldust í forsölu svo var ákveðið að leyfa fólki að skrá sig á biðliasta og fleiri pantaðar. Þá mættu nokkur hundruð manns á leikinn sjálfan. 

„Einnig borguðu leikmenn beggja liða sig inn á leikinn og fjölmörg sem gátu ekki mætt í persónu styrktu málefnið með frjálsum framlögum. Það er því ljóst að Pétur, og málefnið, stóð mörgum mjög nærri,“ bætti Ari Steinn við.

Benedikt Þór, sem er með leikmönnum Augnabliks á forsíðu mynd fréttarinnar, ræddi við leikmenn eftir leik. 

„Hann sagði einfaldlega að þeir áttuðu sig ef til vill ekki á því en að öllum líkindum hefðu þeir bjargað mannslífi eða lífum þar sem fjöldi símtala til samtakanna jókst í kringum leikinn og þá umfjöllun sem hann fékk á samfélagsmiðlum, bæði frá okkur og þeim sem deildu skilaboðunum. Okkur þótti virkilega vænt um að heyra það og það er í raun það sem við erum stoltastir af, þessari vitundarvakningu sem átti sér stað í kringum leikinn,“ sagði Ari steinn að endingu.

Augnablik er ekki eina knattspyrnufélag landsins sem hefur styrkt Píeta í sumar en fyrr í sumar spilaði FH í sérstökum gulum búningum til styrktar Píeta.