Hraun renni yfir svæði mengað af sprengjum

Fram kemur í kvöldfréttum Ríkisútvarpsins að hraun renni nú um Vogaheiði sem var skotæfingasvæði bandaríska hersins á árunum 1952 til 1960. Svæðið sé töluvert mengað af ósprungnum sprengjum þrátt fyrir tilraunir Bandaríkjahers og Landhelgisgæslunnar að hreinsa það.

Sprengjur finnist á hverju ári

„Hraunið er innan svæðisins. Við erum eiginlega að bíða eftir því að hraunið fari út fyrir svæðið svo að við getum átt við þetta,“ segir Einar Sveinn Jónsson, slökkviliðsstjóri í Grindavík, í samtali við fréttastofu.

Hann segir sprengjur hafa fundist á svæðinu á hverju ári og því ekki spurning að þær leynist þar enn.

„Á þessum árum notuðu þeir þetta svæði sem æfingasvæði fyrir hermenn. Það er alveg merkt á þessum gönguleiðum að aðvara fólk að það gætu leynst sprengjur. Herinn hefur verið að reyna að hreinsa þetta upp og Landhelgisgæslan líka. Svæðið er það torfarið að það hefur reynst erfitt. Það finnast á hverju ári sprengjur á þessu svæði,“ segir hann.

Svæðið mjög torfarið

Einar segir þó að þar sem svæðið er það torfarið sé ekki mikil hætta á ferð. Spryngju sprengjurnar færi gosmengunin hvort eð er út á sjó vegna norðanáttar. Hraunið sé mjög úfið.

„Þetta er það vont yfirferðar, alls konar sprungur, hellar og gjótur,“ segir hann.

„Þetta er óvænt twist. Ég þurfti ekki svona twist í þetta,“ segir Einar en verkefni slökkviliðsmanna í Grindavík eru ekki af skornum skammti um þessar mundir.