Spá á­fram­haldandi ó­breyttum stýrivöxtum í næstu viku

Í ágúst hafa stýrivextir verið 9,25 prósent  í heilt ár og telur bankinn því að peningastefnunefndin haldi óbreyttum í næstu viku, sjötta skiptið í röð.

Í frétt bankans segir að síðustu ákvarðanir nefndarinnar hafi verið markaðar af mikilli óvissu á Reykjanesi vegna jarðhræringa auk óvissu tengdum kjarasamningum. Ákvörðunin sem verði tekin í næstu viku muni að öllum líkindum byggja á því hversu hægt verðbólgan hjaðnar.

Þá segir einnig að þegar nefndin kom síðasta saman, í maí, hafi verðbólga staðið í 6 prósentum.

„Þá hafði hún hjaðnað nokkuð hressilega mánuðina á undan en vextir haldist óbreyttir. Síðan hefur verðbólga aftur á móti aukist lítillega á ný og var 6,3% í júlí. Raunstýrivextir miðað við liðna verðbólgu hafa því lækkað um 0,3 prósentustig. Ef verðbólgan hefði haldið áfram að hjaðna duglega í sumar hefði hugsanlega mátt gera ráð fyrir lítilsháttar vaxtalækkun, en í ljósi nýjustu vendinga í vísitölu neysluverðs teljum við nánast útilokað að nefndin hefji vaxtalækkunarferli í næstu viku,“ segir í frétt bankans.

Í frétt bankans er einnig fjallað um vísitölu íbúðaverðs, sem hefur hækkað stöðugt síðustu mánuði, og undirliggjandi verðbólguþrýsting.

„Árshækkun vísitölu íbúðaverðs var 9,1% í júní og hefur ekki verið svo mikil síðan í febrúar 2023. Árshækkun raunverðs íbúða, þ.e. vísitala íbúðaverðs á móti vísitölu neysluverðs án húsnæðis, mældist 5,0% í júní og hækkaði úr 4,0% í maí. Árshækkun raunverðs hefur ekki verið meiri síðan í janúar 2023,“ segir á vef bankans og að kaupsamningum hafi einnig fjölgað verulega á milli ára. Því séu merki á markaði um líflegan íbúðamarkað en það verði að hafa þar í huga innkomu Grindvíkinga í kjölfar uppkaupa Þórkötlu fasteignafélags.

Hafa tekin varfærin skref

Á vef bankans segir að þó svo að verðbólga hafi aukist lítillega hafi verðbólguvæntingar þróast í hagstæða átt á flesta mælikvarða. Ein vísbending sé verðbólguálag á skuldabréfamarkaði.

Verðbólguvæntingar geti haft mikið að segja um verðbólguhorfur og peningastefnunefnd sé mikið í mun að koma böndum á þær.

„Peningastefnunefnd hefur tekið varfærin skref síðustu mánuði og haldið vöxtum óbreyttum í heilt ár. Fyrst nefndinni þótti auknar líkur á því á síðasta fundi að taumhaldið væri hæfilegt er erfitt að færa rök fyrir vaxtalækkun í næstu viku, enda hefur verðbólga aukist lítillega frá því síðast. Þótt vissulega hafi hagvaxtarhorfur einnig versnað í ljósi mikils samdráttar á fyrsta ársfjórðungi ber að hafa í huga að samdrátturinn skýrðist af birgðabreytingum en ekki samdrætti í hagstærðum á borð við einkaneyslu og fjárfestingu,“ segir að lokum í frétt bankans og að enn sé eftirspurnarþrýstingur á íbúðamarkaði og ekki farið að bera á verulega auknu atvinnuleysi.

„Því teljum við að peningastefnunefnd telji áfram þörf á þéttu peningalegu aðhaldi og sjái ekki ástæðu til að óttast ofkólnun í hagkerfinu að svo stöddu.“