Sýslu­maður hótar því að taka að­vent­ista af skrá

Þetta er samkvæmt heimildum Vísis. Halldór Þormar Halldórsson fulltrúi sýslumanns er í fyrirsvari fyrir trúfélög og lífsskoðunarfélög. Hann segist ekki geta staðfest þetta, málið sé í vinnslu en almennt megi segja að þegar félag er fellt af skrá missi það það réttindi sem það öðlast við skráningu.

„Það eru greiðsla á sóknargjöldum, sem eru um 1.000 kr. á hvern félagsmann á mánuði. Félagið getur ekki formlega kallað sig trúfélag, þótt strangt til tekið sé ekkert sem kemur í veg fyrir það. Forstöðumaður í skráðu trúfélagi getur gefið fólk saman í hjúskap, en sá réttur fellur niður. Í reynd fellur líka niður réttur til að standa að öðrum athöfnum, eins og skírn og greftrun, en engu að síður eru reglur varðandi það mjög lauslegar og hver sem er getur gefið barni nafn, sem er svo tilkynnt til Þjóðskrár,“ segir Halldór.

Vísir náði ekki tali af aðventistum, þegar hringt var í opinbert símanúmer var bara símsvari og boðið upp á að lesa inn skilaboð. Gavin Anthony skráður formaður Aðventista svaraði ekki síma en eftir því sem Vísir kemst næst eru skráðir meðlimir í KSDA um fimm hundruð en um 150 þeirra eru virkir.

Engar heimildir til opinberrar eignaupptöku

Samkvæmt heimildum Vísis er uppi orðrómur innan safnaðarins um að ef félagið verði tekið af skrá muni sýslumaður gera upptækar eigur og frysta reikninga félagsins. Að sögn Halldórs Þormars er engu slíku til að dreifa, sýslumaður hefur engar slíkar heimildir.

„Nei, hið opinbera hefur engan rétt á eignaupptöku, hvorki félaga né einstaklinga, nema að undangengnum dómi og sá dómur þarf að byggja á lagaheimildum. Það eru engar heimildir í lögum til að haldleggja eignir trúfélaga.“

Gríðarleg ólga hefur verið innan raða Kirkju sjöunda dags aðventista. Og hefur hópur innan safnaðarins kært stjórnina.

Deilurnar snúast aðallega um samninga KSDA við Eden Mining sem hefur milligöngu um alla efnissölu til Heidelberg. Í landi aðventista, í Þrengslunum, er að finna miklar námur sem Heidelberg hefur nýtt til að grafa fyrir íblöndunarefni í sement. 

Margir meðlimir telja þar ýmislegt fara á milli mála og krefjast svara en stjórnin neitar að afhenda gögn. Það er ekki létt verk fyrir aðventista að stíga fram og gagnrýna stjórnina, það er meira að segja talið siðferðilega hæpið en langlundargeð hluta safnaðarins er brostið og hafa til að mynda Jón Hjörleifur og Ómar Torfason, félagar í KSDA ritað opinbert bréf þar sem þeir boða kærur og að tala um valdarán.

Jón Hjörleifur Stefánsson aðventisti og guðfræðingur hefur haldið af mikilli nákvæmni utan um allt sem að þessu snýr á vefsíðu sem hann heldur úti og heitir theminingcase.com. Staðan er sem sagt sú að aðalfundi sem haldinn var fyrir tveimur árum hefur ítrekað verið frestað og vilja því margir meðima líta svo á að um hafi verið að ræða valdarán innan safnaðarins. Og stjórnin sitji umboðslaus.

Hvaða skilyrði þarf trúfélag að uppfylla?

Halldór Þormar var þá spurður hvað það þýddi almennt fyrir trúfélag að vera fellt af skrá, umfram það sem fram hefur komið í svörum hans?

Halldór sagði að þegar félag fær skráningu þurfi það að uppfylla ákveðin skilyrði og veita tilteknar upplýsingar. Þessi atriði eru:

Halldór Þormar segir að ef þessum reglum sé ekki fullnægt að jafnaði geti félagið talist óstarfhæft og/eða að það hafi vanrækt skyldu sína.

„Þá hafa yfirvöld tvo kosti. Annarsvegar að svipta forstöðumann félagsins rétti hans til starfans og hinsvegar að fella félagið af skrá, eða með öðrum orðum afturkalla skráningu þess. Það er ekki ljóst hvað felst í því að svipta forstöðumann rétti hans til starfans, en ætla má að þar sé átt við að koma fram fyrir hönd félagsins og gefa fólk saman í hjúskap.

Erfið staða innan KSDA

Staðan innan KSDA er því slæm, þar er allt í heljargreipum og fólk þorir vart að tala saman, enginn þorir að stíga fram. 

Einn er þó sá maður sem hefur ekki viljað una stöðunni opinberlega en það er Jón Hjörleifur sem hefur ritað Gavin bréf þar sem hann minnir hann á predikun sem hann hélt um fyrirgefninguna. Að fyrsta skrefið að sátt þyrfti sá að stíga sem gert hefur á hluta hins. 

Jón Hjörleifur segist gera ráð fyrir því að Gavín hafi verið að meina órólegu deildina innan aðventista, en Gavin sé ekki samkvæmur sjálfum sér því hann svari sér ekki.