Gæti haft gríðar­lega þýðingu fyrir Ísa­fjörð

Í fréttum Stöðvar 2 mátti sjá rjúkandi heitt vatnið flæða upp úr borholunni í Tungudal í Skutulsfirði á myndum sem bormenn Ræktunarsambands Flóa og Skeiða tóku í gær. Ísafjarðarbær er næst stærsti þéttbýlisstaður landsins án jarðvarmaveitu, á eftir Vestmannaeyjum, en núna hafa vaknað vonir um að Ísafjörður komist í flokk hitaveitubæja.

„Hitastigið mælist núna vera 58 gráður,” segir Elías Jónatansson orkubússtjóri í samtali við Hafþór Gunnarsson, fréttaritara Stöðvar 2 á Vestfjörðum, sem spurði hvort það væri nothæft:

„Það er vel nothæft, það hitastig. Þá skiptir bara máli hversu mikið magnið er.”

Og gæti að minnsta kosti dugað hluta nærri þrjú þúsund manna byggðar við Skutulsfjörð en framundan er að mæla magnið.

„Þetta myndi þá nýtast allavega hér í firðinum væntanlega. Og vonandi bara meira, líka fyrir eyrina,” segir Elías.

Heita vatnið fannst á 480 metra dýpi og segir Elías greinilegt að þar hafi bormennirnir hitt á æð. Þeir eiga eftir að bora dýpra, sennilega niður á 700 metra.

Bæjarstjórinn á Ísafirði, Arna Lára Jónsdóttir, gat ekki leynt gleði sinni í hádegisfréttum Bylgjunnar. Þar líkti hún þessu við gullfund. En hvað segir orkubússtjórinn?

„Þetta er auðvitað bara mjög jákvæð vísbending. Við erum ekki búnir að finna kannski í því magni sem við þurfum. Við vitum það ekki ennþá.

En þetta hefur gríðarlega þýðingu ef þetta er í nægilegu magni. Því að þá getum við vonandi dregið úr notkun rafmagns við kyndingu.

Ef við finnum ekki nægilegt magn þurfum við varmadælu á vatnið. En það sem sagt ræðst vonandi bara á næstu vikum hvað þessi hola gefur raunverulega.”

-En þetta gæti verið gullnáma?

„Ja, það er engin spurning um að þetta hressir upp á fjárhaginn,” svarar orkubússtjórinn.

Og rifjar upp að Orkubú Vestfjarða neyddist í vetur til að keyra dísilrafstöðvar með tilheyrandi mengun og kostnaði.

„Já, það er auðvitað mjög slæmt fyrir umhverfið. Og það er líka mjög slæmt fyrir fjárhaginn. Við erum sennilega búin að setja í þetta 550 milljónir, bara í vetur, í olíu.”

Og svo mikið er víst: Ísfirðingar hafa núna fengið staðfestingu á því að heitt vatn er í Skutulsfirði og þakkar Elías það sérfræðingum ÍSOR.

„Ég ætla nú bara að óska þeim til hamingju með að hafa hitt á rétta staðinn. Því að það eru auðvitað sérfræðingarnir sem sögðu okkur hvar við ættum að bora,” segir Elías Jónatansson orkubússtjóri.

Hér má sjá frétt Stöðvar 2: