Græn­lendingar segja sig úr Norður­landa­ráði

Í frétt Verdens gang segir að Grænlendingar mótmæli því að fá ekki að taka þátt í fyrirhuguðum fundi Norðurlandaráðs, þar sem utanríkis- og varnarmál verða í brennidepli. Einungis sendinefndum Danmerkur, Finnlands, Noregs og Svíþjóðar, auk Þýskalands, sem er ekki í ráðinu, sé boðið á fundinn.

„Ég get ekki haldið áfram þátttöku þegar þegar slík mismunun viðgengst,“ segir Múte B. Egede, forsætisráðherra Grænlands, í opnu bréfi til sænskra stjórnvalda, sem fara með forsæti í Norðurlandaráði.

Hann hótaði á dögunum að draga Grænland úr ráðinu, og nú hefur hann staðið við stóru orðin.

Egede undirstrikar að hann muni endurskoða ákvörðunina ef Grænlandi verður leyft að taka þátt í störfum ráðsins á jafningagrundvelli. Líka þegar varnar- og öryggismál eru rædd.