Svona var stemmningin á loka­spretti for­seta­efnanna í Hörpu

Heimir Már Pétursson fréttamaður tók forsetaefnin tali á þessum tímamótum, en framboðin verða svo endanlega staðfest lögleg þann 2. maí.

Ásdís Rán fyrst á staðinn

Ásdís Rán Gunnarsdóttir var fyrst frambjóðenda að mæta á staðinn og sagðist hafa fengið rosalega góða þjálfun erlendis, verið í hálfgerðu sendiherrastarfi að kynna land og þjóð um allan heim. Hún sagðist vera mjög hæf til að taka að sér starf forseta Íslands.

Ásdís Rán sagði að hún treysti sér sannarlega til að leiða stjórnarmyndunarviðræður. Ef hún gæti flogið þremur gerðum af þyrlum þá gæti hún tekið ákvarðanir fyrir þjóðina.

Eiríkur Ingi annar

Annar var Eiríkur Ingi Jóhannsson. Hann sagðist hafa safnað nánast öllum 1.500 meðmælunum á pappír og séð um það sjálfur. 

Hann skilgreinir sitt erindi á Bessastaði þannig að hann vill auka lýðræði og aðskilja löggjafar- og framkvæmdavaldið.

Óvæntur frambjóðandi þriðji

Þriðji frambjóðandinn til að mæta á fund landskjörstjórnar var var Viktor nokkur Traustason. Hann hafði ekki haft hátt um framboð sitt en sagði í samtali við Heimi Má að það vanti í umræðuna alvöru stefnumál og markvissa stefnu.

Viktor er spurður út í reynslu sína. Hann segist einfaldlega hafa lifað lífinu. Hann segist vera á milli starfa, eða vera atvinnulaus aumingi. Hann hefði aldrei haft tíma til að gera þetta ef hann væri ekki á milli starfa.

Fjórði maðurinn ætlar að reima á sig skóna

Arnar Þór Jónsson lögmaður var fjórði. Hann sagðist nú þurfa að reima á sig skóna og lætur fjölmiðla ekki segja sér að leikurinn sé afgreiddur.

Arnar Þór sagðist telja að runnir séu upp mjög alvarlegir tímar. Þjóðin verði að taka ábyrgð á framtíð og nútíð og forseti geti ekki verið í veislum og partýjum. Hann þurfi að axla ábyrgð sína og hafa augun á þeirri löggjöf sem streymi inn í gegnum alfarið. Við séum í bremslulausu stjórnarfari. Forseti verði að hafa eftirlit með því sem sé að gerast - fylgjast með þeim lögum sem eru að streyma í gegn.

Halla Tómasdóttir fimmta

Halla Tómasdóttir var fimmta til að mæta á fund landskjörstjórnar. Hún sagðist rétt að koma út úr búningsherberginu og samtalið við þjóðina væri að hefjast. 

Halla sagði að því bæri að fagna að svo margir vilji taka þátt og vera í þjónustu við þjóðina. Hún velji að gera gagn í sínu lífi og sé full bjartsýni sem hún velji með sól í hjarta.

Steinunn Ólína sjötta og undirskriftarlisti í pípunum

Steinunn Ólína Þorsteinsdóttir var sjötta. Hún sagði daginn vera fallegan – stóran dag því í dag ætli hún að biðja íslensku þjóðina um að skrifa undir undirskriftarlista og skora á íslensk stjórnvöld að hafna frumvarpi um lagareldi sem kveði á um að gefa auðlindir þjóðarinar endurgjaldslaust til allrar frambúðar.

Hún segir aðalerindi sitt á Bessastaði vera að verða forseti sem treystir sér til að standa alltaf með hagsmunum fólksins í landinu.

Ástþór 007

Ástþór Magnússon var sjöundi á staðinn. Hann benti á að hann væri númer sjö, 007, og þetta sé sjöundi forsetinn sem verði kosinn.

Ástþór vakti í viðtali athygli á bók sinni Virkjum Bessastaði. Þar sé svarið við því hvers vegna hann sé að bjóða sig fram. Þar sé stefnuskráin, það sem Ísland þurfi að gera til að afstýra styrjöld.

Baldur og Felix númer átta

Baldur Þórhallsson var áttundi á fund landskjörstjórnar. Hann mætti með Felix Bergssyni, eiginmanni sínum.

Baldur segir mjög mikilvægt að forseti líti yfir öxlina á þingheimi til að tryggja að þingið fari ekki fram úr sér. Forsetinn grípi í neyðarhemil ef þingið fer fram úr sér. Þeir Felix vilji nýta dagskrárvald forseta; mannréttindi barna og ungmenna aðalmál. Draumur að við stöndum fremst meðal þjóða varðandi málefni ungs fólks. Líka í jafnréttismálum. Myndi vilja taka á geðheilsbrigðismálum, vaxandi vanlíða, lestri og lesskilningi. Kalla ólíka hópa fólks saman sem eru að vinna að málefnum ungs fólks - finna sameiginlega fleti til að vinna með til að lyfta málaflokknum á hærra plan. Eftir fjögur ár hafi árangur náðst.

Þjóðleg gleði hjá þeim níunda

Jón Gnarr er níundi. Hann sagðist ekki hafa hugmynd um hve mörgum meðmælum hann hafi náð. Allavega lágmarkinu. Jón segir að hann myndi vilja dreifa þjóðlegri gleði til þjóðarinnar, aðspurður um erindi sitt.

Hann segist treysta Alþingi mjög vel, sé talsmaður lýðræðis og ekki hrifinn af einræði nema í undantekningartilfellum. Myndi reyna að sinna vel öllum skyldum og starfi, en aukræðis gera það gleðilega.

Halla Hrund tíunda

Halla Hrund Logadóttir var tíunda til að skila inn framboði sínu. Hún segist vilja að forseti styðji allt hið góða og sái þeim fræjum með allri þjóðinni sem muni gera að verkum að framtíðin verði ekki bara mín og þín heldur komandi kynslóða. Framtíðin eigi landið að.

Halla Hrund segist vilja fara varlega með málskotsréttinn. Ef upp komi ákaflega sérstakar aðstæður þá skipti máli að forseti sé ekki flokkspólitískur, skilji gangverk stjórnmála - þar nýtist henni reynslan úr orkumálum. Nefnir auðlindamál sem dæmi eða mannréttindi. En þingið eigi að virka sem allra best.

Katrín ellefta

Katrín Jakobsdóttir var ellefta í röð frambjóðenda til að mæta á fund landskjörstjórnar. Hún sagði að vel hefði gengið vel að safna meðmælum. Hún sagði að forsetinn eigi að vera sameiningarafl, ekki bara sameiningartákn.

Samfélagið sé orðið fjölbreyta og um leið ríkara. Slíkt kalli á að forystufólk í samfélaginu tryggi rætur í sögunni.

Helga tólfta

Helga Þórisdóttir forstjóri Persónuverndar var tólfti frambjóðandinn sem mætti í hús. Hún sagðist eiga von því að koma á Hörpu á tónleika en að þetta er stórkostleg stund. Hún sagði þetta hafa verið blöndu af rafrænum og pappírsmeðmælum.

Helga segist vinna fyrir mikilli hamingju og stuðningi. Gaman hafi verið að fara um landið og finna stuðninginn.

Þrettándi maðurinn óvæntur

Kristín Edwald, Formaður landskjörstjórnar, staðfesti upp úr klukkan 12 að tólf frambjóendur hefðu skilað inn framboði. Fimm hafi gert það einungis með rafrænum meðmælendum, en sjö bæði rafrænt og á pappír.

Kristín sagði að aldrei hafi svo margir skilað inn framboði til forseta Íslands. Í yfirlýsingu frá landskjörstjórn að þrettándi frambjóðandinn hafi skilað inn framboði til forseta með rafrænum hætti. Það hafi verið Kári Vilmundarson Hansen.

Hægt er að sjá útsendingu fréttastofunnar í heild sinni í spilaranum að neðan.

Fréttin hefur verið uppfærð.