Metamfetamín felldi mark­vörðinn

Þýska lyfjaeftirlitið hefur nú staðfest við þýska fjölmiðla að það sem felldi Portner hafi verið örvandi efnið metamfetamín, sem greindist í prufu úr honum. Efnið er flokkað með efnum á borð við amfetamín og kókaín en er enn sterkara og meira ávanabindandi.

Ekki er búið að dæma Portner en hann er þó kominn í hlé frá æfingum og keppni á meðan að málið er til meðferðar. Hann á rétt á að andmæla og fara fram á að B-sýni verði skoðað en sagan sýnir að allar líkur eru á að það sýni skili sömu niðurstöðu.

Gæti hafa grætt á að nota efnið

Þýski lyfjasérfræðingurinn Fritz Sörgel segir við fréttaveituna dpa að Portner gæti vel hafa grætt á því að nota metamfetamín fyrir leik. Það geti til að mynda aukið viðbragð. „Markvörður sem nær að hreyfa hendurnar 1/10 úr sekúndu hraðar, gæti þannig náð að verja vítakast,“ bendir Sörgel á.

Portner, sem er þrítugur, hefur varið mark Magdeburg frá árinu 2022 og er liðsfélagi Gísla Þorgeirs Kristjánssonar, Ómars Inga Magnússonar og Janusar Daða Smárasonar. Hann er einnig landsliðsmarkvörður Sviss.

Magdeburg þarf nú að reiða sig alfarið á Spánverjann Sergey Hernandez í þeirri titlabaráttu sem fram undan er hjá liðinu, og þar er næst á dagskrá bikarhelgin í Þýskalandi en Magdeburg mætir Füchse Berlín í stórleik í undanúrslitum á morgun.

Fullyrti að hann hefði engar reglur brotið

Þegar fyrstu fréttir bárust af því að Portner hefði fallið á lyfjaprófi, áður en ljóst var hvaða efni felldi hann, sagði hann tíðindin koma sér í opna skjöldu. Hann hélt fram sakleysi sínu í skrifum á Instagram:

„Kæra Magdeburg og svissneska handboltafjölskylda, kæru stuðningsmenn. Því miður verð ég að segja ykkur þetta: Ég hef fengið að vita að sýni úr mér virðist skila „niðurstöðum sem eru ekki venjulegar“ og þess vegna þarf að bregðast við því.

Ég er í algjöru áfalli yfir þessum upplýsingum. Mér þykir fyrir því að þessi staða hafi komið upp og ég mun gera allt sem ég get til að sýna að ég hef ekki brotið neinar reglur um lyfjamál, hef alltaf hagað mér í samræmi við gildi íþrótta og mun áfram gera það.“