Út­farar­stofa gagn­rýnd fyrir að senda eldri borgurum Valentínusar­kort

„Sem betur fer tókst okkur að fela kortið áður en mamma sá það, því það hefði verið hræðilegt. Það er ógeðfellt að útfararstjórar skuli freista þess að afla nýrra kúnna með því að beina auglýsingum sínum til viðkvæms eldra fólks,“ hefur Sun eftir ástvini íbúa heimilisins, Whitegates Care Centre.

Kortið var skreytt rauðu hjarta og bleikum borða og bar skilaboðin: „Sent með ást frá TH Sanders & Sons“.

Forsvarsmenn hjúkrunarheimilisins hafa varið ákvörðunina að leyfa dreifingu kortsins til íbúa og sagt að heimilið kunni að meta góðvild allra nágranna, þeirra á meðal útfararstofunnar. Hún hafi meðal annars gefið teppi um jólin, kort og sælgæti og fræ fyrir garð heimilisins.

„Íbúarnir voru mjög ánægðir með að fá Valentínusarkort og áttu allir góðan dag,“ sagði heimilið í yfirlýsingu.

Talsmaður Dignity, móðurfélag Whitegates Care Centre, sagði fyrirtækið hins vegar harma ef kortin hefðu valdið einhverjum vanlíðan. Það væri markmið Dignity að viðhalda jákvæðum og virðingafullum samskiptum við þau samfélög sem fyrirtækið þjónaði.

Að þessu sinni hefðu tilraunir þess til að tengja við samfélagið verið illa ígrundaðar og óviðeigandi.