Hörn, Jóhanna Vig­dís og Vala til D­efend Iceland

Í tilkynningu kemur fram að verkefnið Verjum Ísland, eða Defend Iceland, sé svokölluð villuveiðigátt þar sem öryggissérfræðingar úr mörgum áttum og með ólíkan bakgrunn leiði saman krafta sína í því skyni að koma í veg fyrir alvarleg innbrot í net-, tölvu- og hugbúnaðarkerfi fyrirtækja og stofnana.

„Villuveiðigáttir (e. bug bounty platforms) eru þekkt leið til að virkja öryggissérfræðinga sem herma aðferðir hakkara við leit að öryggisveikleikum. Markmið Defend Iceland er að finna öryggisveikleika á undan tölvuglæpamönnum og sjá til þess að þeir verði lagfærðir áður en hægt er að valda alvarlegum skaða.

Öryggissérfræðingarnir fá greitt fyrir að finna veikleika og er villuveiðigátt Defend Iceland sniðin að þörfum íslenskra fyrirtækja og stofnana, innleiðing hennar er einföld og fljótleg og kostnaði haldið í lágmarki.

Hörn Valdimarsdóttir er rekstrarstjóri og hluti af stofnteymi Defend Iceland. Hún hefur starfað við mannauðsmál frá árinu 2019 og vann hjá hugbúnaðarfyrirtækinu Tempo Software áður en hún hóf störf sem mannauðsstjóri Syndis árið 2022. Hörn er með BSc gráðu í sálfræði og MSc gráðu í mannauðsstjórnun frá Háskóla Íslands.

Jóhanna Vigdís Guðmundsdóttir er framkvæmdastjóri nýsköpunar, sölu og markaðsmála og hluti af stofnteymi Defend Iceland. Hún kemur til Defend Iceland frá Almannarómi – miðstöð máltækni, þar sem hún var framkvæmdastjóri. Áður starfaði hún meðal annars sem framkvæmdastjóri hjá Háskólanum í Reykjavík og forstöðumaður fjárfestatengsla hjá Straumi fjárfestingarbanka. Jóhanna Vigdís er með MBA gráðu frá HR og AMP gráðu frá IESE Business School.

Vala Smáradóttir er framkvæmdastjóri vöru- og verkefnastýringar og hluti af stofnteymi Defend Iceland. Hún hefur síðustu ár unnið að verkefnum í stafrænum umbreytingum og nýsköpun á sviði sjálfbærni og vöru- og hugbúnaðarþróunar. Hún er með bakgrunn í verkefnastjórnun, hagnýtum markaðsfræðum og miðlun. Vala er með BA gráðu í ensku og MA gráðu í hagnýtri menningarmiðlun auk viðbótardiplóma í kennslufræðum,“ segir í tilkynningunni.

Um Defend Iceland

Fram kemur að Defend Iceland sé stofnað af Theódór Ragnar Gíslason, sem hafi umfangsmikla reynslu í tæknilegu netöryggi, með yfir 25 ára starfsreynslu auk þess að vera forfallinn frumkvöðull. 

„Hann er einn stofnenda Syndis og starfar þar í dag sem tæknistjóri auk þess sem hann var var einn stofnenda nýsköpunarfyrirtækisins Adversary sem var selt árið 2020 til ástralska öryggisfyrirtækisins Secure Code Warrior.

Defend Iceland var stofnað í fyrra og eru Háskóli Íslands og Háskólinn í Reykjavík meðal samstarfsaðila verkefnisins. Þá hefur það hlotið 2,6 milljóna evra styrk frá Framkvæmdastjórn Evrópusambandsins, en það jafngildir um 400 milljónum króna,“ segir í tilkynningunni.