Fólk með mis­linga beðið um að taka upp símann

Þetta kemur fram í yfirlýsingu frá Heilsugæslu höfuðborgarsvæðisins en fólk getur fengið ráðleggingar vegna gruns um mislingasmit í gegnum netspjall Heilsuveru.

Erlendur ferðamaður greindist nýverið með mislinga hér á landi og er unnið að smitrakningu. Talið er að óbólusett börn séu meðal þeirra hundraða sem útsettir eru fyrir smiti.

Sjá einnig: Óbólusett börn meðal útsettra

Foreldrar óbólusettra barna eru hvött til að bólusetja þau hið snarasta.

Börn 0-6 mánaða

Börn 0-6 mánaða eru ekki bólusett.

Ef upp kemur hópsýking eru foreldrar hvattir til að halda börnum á þessum aldri frá margmenni.

Börn 6-18 mánaða

Börn 6-18 mánaða geta aðeins fengið bólusetningu ef talin er hætta á að þau smitist eða hafi smitast.

Bólusetning innan þriggja sólarhringa frá smiti minnkar líkur á veikindum.

Ef upp kemur smit fer smitrakning í gang. Haft verður samband við foreldra með skilaboðum á Mínum síðum á Heilsuveru eða SMS.

Ef foreldrar fá ekki skilaboð er ekki boðið upp á bólusetningu fyrir börn á þessum aldri.

Bólusetning sem gerð er fyrir 12 mánaða aldur veitir ekki langtímavörn og þarf þá að endurtaka bólusetninguna við 18 mánaða aldur og svo aftur við 12 ára aldur.

Börn 18 mánaða og eldri

Foreldrar barna 18 mánaða og eldri sem ekki hafa verið bólusett eru hvattir til að þiggja bólusetningu fyrir börn sín sem fyrst.

Best er að hafa samband við sína heilsugæslustöð og fá tíma í bólusetningu.

Ef foreldrar eru ekki vissir hvort barn er bólusett má finna upplýsingar um það á Mínum síðum á Heilsuveru. Einnig er hægt að hafa samband við Upplýsingamiðstöð Heilsugæslu höfuðborgarsvæðisins í síma 1700 eða í gegnum netspjall Heilsuveru og fá upplýsingar um bólusetningu barna.

Fullorðnir einstaklingar

Ekki á að bólusetja fólk sem er fætt fyrir 1970 þar sem miklar líkur eru á að þeir hafi fengið mislinga.

Ef upp kemur smit í nánasta umhverfi fullorðinna sem fæddir eru 1970 eða síðar mun smitrakningarteymi hafa samband og bjóða viðkomandi bólusetningu.

Einkenni mislinga

Mislingar eru bráðsmitandi veirusjúkdómur, allt að 90 prósent útsettra smitast. Smit verður helst með úða frá öndunarfærum, til dæmis við hósta eða hnerra. Ólíkt inflúensu og kvefveirum getur mislingaveiran legið í loftinu og valdið smiti í allt að tvær klukkustundir eftir að hún berst út í andrúmsloftið.

Einkenni mislingasmits eru oftast lík flensueinkennum í byrjun og koma fram 1-3 vikum eftir smit.

Bólgnir eitlar

Hiti

Nefrennsli

Hósti

Höfuðverkur

Sviði í augum, roði og/eða vot augu

Útbrot sem ná yfir allan líkamann koma fram á þriðja eða fjórða degi

Útbrot í slímhúðum í munni eru mjög einkennandi en eru helst sýnileg fyrsta daginn sem útbrot koma fram

Ung börn fá oft niðurgang með hita áður en útbrotin koma fram