Ofbeldishrina tveggja táningspilta: „Við erum að fara að drepa ykkur alla“

Annar þeirra var dæmdur fyrir þrjár líkamsárásir og hlaut sex mánaða dóm, skilorðsbundin til tveggja ára. Refsingu hins mannsins, sem var sakfelldur fyrir tvær líkamsárásir, var frestað haldi hann almennt skilorð í tvö ár.

Í dómnum kemur fram að báðir piltarnir verði bráðlega átján ára, en að þeir hafi verið fimmtán og sextán þegar brotin hafi verið framin. Litið var til ungs aldurs þeirra við ákvörðun refsingar á hendur þeim.

Ógnvænlegar lýsingar

Ákæruliðir málsins voru þónokkrir. Hvar brot þeirra voru framin kemur ekki skýrt fram í hverjum ákærulið, en þau virðast flest hafa átt sér stað á norðurlandi, bæði á Akureyri og í Húsavík.

Sá fyrsti varðar hótanir sem sá sem fékk þyngri dóminn sendi í öðrum ungum einstaklingi í skilaboðum á samfélagsmiðlinum Instagram í maímánuði 2021. Þar sendi hann meðal annars: „Br ætla að drepa þig fyrir að lemja litla frænda minn“ og „Þú kærir og ég ætla ekki að hafa á saka skránni minni að ég lamdi 05 illa mep vopni“

Þá var hinn pilturinn ákærður fyrir líkamsárás sem átti sér stað í október 2022. Þar var honum gefið að sök að taka annan einstakling hálstaki, leggja hníf að hálsi hans og slá hann í höfuðið með leikfangabyssu úr plasti. Með því þótti hann hafa vakið ótta hjá brotaþolanum um líf sitt og heilbrigði.

Spörkuðu í liggjandi mann

Næsti ákæruliður varðaði líkamsárás sem piltarnir frömdu saman í maí 2021. Í lýsingum á árásinni segir að þeir hafi kýlt annan einstakling með krepptum hnefum sem varð til þess að brotaþolinn féll til jarðar. Á meðan hann lá eru drengirnir sagðir hafa haldið árás sinni áfram með því kýla, sparka og stappa á brotaþola.

Þá var annar þeirra ákærður fyrir samskonar árás sem var framin í júní 2021 í félagi við ósakhæfan einstakling.

Piltarnir voru ákærðir fyrir þjófnað, með því að stela Iphone-síma úr verslun í Glerártorgi á Akureyri. Ákæruvaldið féll frá því að ákæra þann sem fékk þyngri dóminn fyrir þjófnaðinn, en sá sem fékk vægari dóminn játaði að hafa framið það.

„Verð alltaf laus þangað til ég næ honum“

Pilturinn sem fékk þyngri dóminn var einnig ákærður fyrir fjölda hótanna í garð stjúpmóður drengs, þar sem hann talaði um að hann myndi beita drenginn grófu ofbeldi. Hótanir hans eru sagðar hafa vakið ótta hjá konunni um líf og heilbrigði stjúpsonar síns.

Hótanirnar bárust í apríl 2022 bæði í gegnum skilaboð á Messenger og í gegnum myndsímtal. Á meðal hótanna sem hann sendi á Messenger voru: „Við erum að fara að drepa ykkur alla ef þið farið ekki utur husinu“ og „Þú veist þið eruð dauðir þegar ég kem til ak ætla ég að taka félaga minn og slampa hausnum ykkar í jorðina þangað til ég sé heilan ykkar lekka á golfinu“

Og á meðal þess sem hann sagði við stjúpmóðurina í myndsímtali var eftirfarandi: „Já, já, þetta er allt í lagi, það skiptir ekki máli þó þú hringir á lögregluna, það er ekki eins og þeir séu að fara að setja mig í einhvern klefa fyrir eitthvert brot sem ég, ég braut ekki nein lög. Ég er ekki búin að gera honum neitt. Ég verð alltaf laus þangað til ég næ honum, fattarðu mig? Skilurðu mig?“

Síðasti ákæruliðurinn varðaði líkamsárás piltsins þar sem hann var ákærður fyrir þriðju líkamsárásina sem hann framdi, og þá fjórðu í heildina. Þar var honum gefið að sök að hafa ráðist á annan einstakling með hnefahöggum fyrir utan verslun á Akureyri í ágúst 2021.

Hefnd með langan aðdraganda

Í niðurstöðukafla dómsins segir pilturinn, sem fékk þyngri dóminn, hafi réttlætt brot sín með því að segja að brotaþolarnir hafi gert eitthvað á hans hlut eða annarra sem tengjast honum. Ekki hafi verið um „skyndilegt stjórnleysi“ að ræða heldur hefnd sem átti sér í einhverjum tilvikum langan aðdraganda.

Annar piltanna, sá sem hlaut vægari dóminn, játaði öll sín brot, en hinn ýmist játaði og neitaði sök, en var sakfelldur í öllum ákæruliðum. Bótagreiðslur sem mönnunum er gert að greiða fimm brotaþolum málsins hljóða samanlagt upp á þrjár milljónir króna. Sá sem fékk þyngri dóminn þarf að greiða rúma sjö og hálfa milljón króna í sakarkostnað og sá sem fékk vægari dóminn þarf að greiða tæplega fjórar og hálfa milljón.

Líkt og áður segir hlaut annar piltanna sex mánaða skilorðsbundin dóm, og refsingu hins var frestað haldi hann skilorð. Í dómnum segir að mikilvægt sé að drengirnir fái viðeigandi meðferð við vandamálum sem þeir glími við.