Hafa komist að sam­komu­lagi um gjörbreytta til­lögu

Frá þessu greindi Linda Thomas-Greenfield, sendiherra Bandaríkjanna við Sameinuðu þjóðirnar, í gær en hún sagði breytingar á tillögunni meðal annars fólgnar í því að ekki er talað um „tafarlausa stöðvun átaka“.

Þess í stað er orðalagið á þann hátt að neyðaraðstoð verði tryggð á svæðinu.

Það liggur ekki fyrir hvort öll önnur ríki sem eiga fulltrúa í öryggisráðinu séu fylgjandi tillögunni, til að mynda Rússland. Þá vildi Thomas-Greenfield ekki gefa upp í gær hvað Bandaríkin myndu gera, hvort þau myndu greiða atkvæði með tillögunni eða sitja hjá.

Að minnsta kosti virðist sem Bandaríkjamenn muni ekki beita neitunarvaldi sínu, sem þeir hafa nú þegar gert í tvígang varðandi tillögur um vopnahlé á Gasa.

Samkvæmt Samhæfingarskrifstofu aðgerða SÞ í mannúðarmálum (OCHA) héldu loftárásir Ísraelsmanna á Gasa áfram í gær. Þá var einnig barist víðast hvar á svæðinu, nema í Rafah. Hamas gerði einnig loftárásir á svæði í Ísrael.

Hungursneyð er sögð blasa við íbúum Gasa að óbreyttu. Rania Al Abdullah, drottning Jórdaníu, sagði í aðsendri grein í Washington Post, að ástandið líktist martröð og sagði nýtt viðmið að skapast um hvað þætti ásættanlegt, sem væri áhyggjuefni fyrir þessi átök og átök framtíðar.