Út­lendinga­stofnun setur fjöl­skyldu­sameiningar Palestínu­manna í for­gang

Bjarni Benediktsson utanríkisráðherra segist hafa rætt við Eli Cohen utanríkisráðherra Ísraels og fengið þar tækifæri til að koma sjónarmiðum Íslands á framfæri.

„Þar á meðal þingsályktun frá Alþingi. Auðvitað ekkert síður til að hlusta eftir sjónarmiðum. Maður vill fá að heyra hvernig menn leggja mat á stöðuna. Ég hef sömuleiðis óskað eftir símtali við utanríkisráðherra Palestínu. Það var á dagskrá og við vorum að reyna að ná saman fyrir nokkrum dögum en það gekk ekki,“ segir Bjarni. Bæði hafi komið upp óvæntur fundur hjá Riyad al-Malik og símasamkiptin hafi verið erfið.

Hvað er það sem Íslendingar geta gert umfram það sem við höfum nú þegar gert?

„Grundvallaratriðið er að gera skilyrðislausa kröfu um að menn fari að alþjóðalögum og mannúðarlögum. Það eru þessi grundvallarréttindi sem við eigum svo mikið undir sjálf að séu virt og teljum að eigi að vísa veginn um það hvernig menn komast út úr svona stöðu,” segir utanríkisráðherra. Þá hafi fjárframlög til neyðaraðstoðar við Palestínumenn verið aukin og Útlendingastofnun sett fjölskyldusameiningar Palestínumanna hér á landi í forgang.

„Í augnablikinu virðast átökin halda áfram vegna þess að þessir deilandi aðilar eru ekki sammála um að sleppa lausum gíslum gegn föngum. Það er ágreiningur enn um það. Eins og ég les í stöðuna segja Ísraelsmenn að það sé tvennt sem þeir ætla að ná fram. Það er annars vegar að fá gíslana alla heim að nýju og hins vegar að lama starfsgetu Hamas,” segir Bjarni.

Íslendingar voru fyrstir til að viðurkenna sjálfstæði Palestínu og Bjarni segir þá afstöðu ekkert hafa breyst.

„Það er tveggja ríkja lausnin sem við höfum talað fyrir til þessa. Það er það sem maður er enn að horfa til að gæti skapað grundvöll fyrir betra lífi fyrir alla í þessum heimshluta,“ segir Bjarni Benediktsson.