Vill um­bylta starfinu og byggja stjórn­stöð: „Dauða­færi að vinna gullið“

„Vinnum gullið“ var yfirskrift ráðstefnunnar sem forseti Íslands, herra Guðni Th. Jóhannesson, setti á mánudagsmorgun. Afreksíþróttafólk, fræðifólk, fulltrúar atvinnulífsins og erlendir gestir tóku þar til máls.

Vegna aðsóknar þurfti að færa viðburðinn úr Grand Hótel í Silfurberg í Hörpu þar sem fleiri en 400 manns skráðu sig til þátttöku. Fulltrúar frá flestum, ef ekki öllum sérsamböndum landsins voru þar mættir ásamt íþróttafólki, fulltrúum félaga og fleiri til.

Meginatriði dagsins var erindi Vésteins Hafsteinssonar, afreksstjóra ÍSÍ, sem kynnti til sögunnar nýja stefnu í afreksíþróttum hérlendis sem hann hefur unnið að ásamt vinnuhópi mennta- og barnamálaráðuneytisins. Sá hópur er meðal annars skipaður fólki úr ráðuneytum, frá ÍSÍ, UMFÍ og Samtökum sveitarfélaga.

Samstarf þessara aðila, auk atvinnulífsins, sé forsenda fyrir því að stefnan nái fram að ganga.

„Þetta gengur út á skipulag á milli íþróttahreyfingarinnar, ríkisins, sveitarfélaga, atvinnulífsins og skólakerfisins upp á það að ná góðum árangri,“ segir Vésteinn um nýja stefnu.

„Við viljum að umgjörðin sé betri. Að við búum til afreksíþróttasjóð Íslands þar sem fólk verður á launasjóði til þess að geta verið með fagteymisvinnu á vegum afreksmiðstöðvar Íslands sem við viljum búa til í Laugardalnum,“

„Það gengur út á að miðlæg stjórnstöð sem er í Laugardalnum sem vinni með dreifistýrt kerfi út um allt land, á átta svæði, og ná árangri, finna efni, finna þjálfarana og búa til afreksfólk.“ segir Vésteinn.

Í erindi sínu tók hann fyrir stærstu þættina sem hefðu áhrif á árangur þjóða í íþróttum og fjármagn var þar efsta á lista. Listann má sjá á myndinni að neðan.

Miðstöð íþrótta verði byggð í Laugardal

Vésteinn nefnir íþróttamiðstöð. Slík miðstöð eigi yfirumsjón með afreksstarfi í landinu og sé hún að fyrirmynd því sem tíðkast á öðrum Norðurlöndum og víðar í álfunni.

Í sjónvarpsfréttinni að ofan má sjá svipmyndir frá afreksíþróttamiðstöð Lúxemborgar, ríki að svipaðri stærð og Ísland, en sú miðstöð var kynnt af fulltrúa íþróttasambands ríkisins á ráðstefnunni. Neðst í fréttinni má sjá YouTube myndband frá íþróttasambandi Lúxemborgar þar sem starfsemi miðstöðvarinnar er kynnt.

Svipað og þar í landi geti afreksíþróttafólk hérlendis sótt þangað allskyns stoðþjónustu og fengið leiðbeiningar sérfræðinga. Til að mynda á sviði íþróttatækni og rannsókna, hvað varðar styrktarþjálfun, lífaflfræði (e. biomechanics), skipulag á æfingum, hvað varðar menntun og að huga að ferli eftir íþróttir, sálfræðiaðstoð, næringarfræði, og læknisþjónustu og sjúkraþjálfun.

Enn verið að meta kostnað samkvæmt ráðherra

En nú er Ísland þegar á undanþágum hvað bæði þjóðarvöll og þjóðarhöll varðar, verkefni sem þarf að ganga í. Bæti maður íþróttamiðstöð við í Laugardalinn er ljóst að kostnaðurinn er mikill. Því er vert að spyrja ráðherra íþróttamála um þann kostnað.

„Það er hluti af því sem við erum að gera hér í dag. Við erum að undirbúa það, það er erfitt að fjárhagsmeta hluti fyrr en að þú ert búinn að ramma inn hverjar aðgerðirnar eru. Þannig að það verður verkefni næstu mánaða og þá munum við kynna það,“ segir Ásmundur Einar Daðason, ráðherra mennta- og barnamála sem jafnframt fer með íþróttamálin í landinu.

„Ég þykist nú vita um íslenska þjóð, að fátt er það sem hún er tilbúin að þjappa sér á bakvið jafn mikið eins og íþróttafólkið okkar og árangur okkar í þeim efnum. Vegna þess að fátt er það annað sem skilar meiri arði inn í framtíðina eins og akkúrat þetta fólk,“ segir Ásmundur jafnframt.

Dauðafæri en snýst um samvinnu

Vésteinn segir dauðafæri vera núna til að taka skrefið inn í framtíðina og móta nýja stefnu ásamt því að byggja upp aðstöðu sem samvarar þeirri í samanburðarríkjum.

„Núna erum við í dauðafæri að ná árangri á heimsmælikvarða og vinna gullið. Auk þess að hugsa um börnin og og starfið í heimahéruðunum, hjá deildunum og félögunum. Við munum sjá til þess að hlusta á hvert annað, berum virðingu fyrir hvort öðru og vinnum saman,“ segir Vésteinn.

En framtíðin er björt?

„Já, ég tel það.“ segir Vésteinn að endingu.

Fréttina má sjá í heild sinni í spilaranum að ofan.