Skagakonur spila til styrktar fjölskyldu Violetu

Ingvi Þór Sæmundsson skrifar 7. september 2023 08:01

Skagakonur hafa ákveðið að styðja við bakið fjölskyldu Violetu Mitul, leikmanns Einherja, sem lést af slysförum í smábátahöfninni á Vopnafirði á þriðjudaginn.

Violeta var 26 ára þegar hún lést en hún fæddist í Moldóvu 3. apríl 1997. Hún gekk í raðir Einherja í vor og var í stóru hlutverki í liðinu í sumar.

„Hún var traustur liðsmaður og fyrirmyndar fótboltakona. Andlát hennar er okkur öllum mikið áfall og skarðið sem hún skilur eftir sig stórt. Hugur okkar er hjá liðsfélögum hennar og þjálfurum sem syrgja traustan Einherja,“ sagði í tilkynningu Einherja í gær.

Tilkynningin frá Einherja

Það er með djúpri sorg í hjarta sem við tilkynnum um sviplegt fráfall leikmanns okkar, liðsfélaga og vinkonu, Violetu Mitul sem lést af slysförum aðfaranótt 4. september, aðeins 26 ára gömul. Samfélagið á Vopnafirði er harmi slegið.

Violeta, sem fæddist 3. apríl 1997 í Moldóvu, gekk til liðs við Einherja í vor og gegndi lykilhlutverki í liði meistaraflokks kvenna í sumar. Violeta var góðhjörtuð, dugleg og brosmild. Hún var traustur liðsmaður og fyrirmyndar fótboltakona. Andlát hennar er okkur öllum mikið áfall og skarðið sem hún skilur eftir sig stórt. Hugur okkar er hjá liðsfélögum hennar og þjálfurum sem syrgja traustan Einherja.

Fjölskyldu Violetu, þeim Alexandru, Mariu, Veaceslav og Juliu sendum við okkar dýpstu samúðarkveðjur. Á svo hörmulegri stundu eru engin orð eða gjörðir sem græða sárið sem missirinn skilur eftir sig en við munum gera það sem í okkar valdi stendur til að létta undir með fjölskyldu og vinum sem eiga um sárt að binda á þessum sorgartímum.

Söfnunarreikningur fyrir fjölskyldu Violetu hefur verið stofnaður í nafni félagsins:

610678-0259

0178-05-000594

Ungmennafélagið Einherji

ÍA, sem leikur í sömu deild og Einherji, hefur ákveðið að leggja Vopnfirðingum og fjölskyldu Violetu lið og leikur liðsins gegn Smára í kvöld verður tileinkaður þeim.

Við innganginn í Akraneshöllinni, þar sem leikurinn fer fram, verður posi merktur styrktarreikningi sem Einherji stofnaði fyrir aðstandendur Violetu. Tekið verður við frjálsum framlögum á meðan leik stendur. Þá munu leikmenn ÍA og Smára spila með sorgarbönd til minningar um Violetu.

Leikurinn í kvöld er síðasti heimaleikur ÍA á tímabilinu. Liðið er í 2. sæti 2. deildar með 35 stig, einu stigi á undan Haukum og Völsungi. Einherji er í 6. sæti deildarinnar.

Íslenski boltinn ÍA Vopnafjörður

Mest lesið

Fleiri fréttir