Hafnarfjörður kaupir ráðhús á 350 milljónir

Rósa Guðbjartsdóttir bæjarstjóri Hafnarfjarðar og Sigríður Hrefna Hrafnkelsdóttir framkvæmdastjóri Einstaklingssviðs Íslandsbanka skrifuðu undir samning þess efnis í dag. Þetta kemur fram í tilkynningu frá bæjarfélaginu.

Umrætt hús hýsir ráðhús Hafnarfjarðar og útibú Íslandsbanka. Bankinn mun koma til með að leigja af bænum hluta rýmisins á jarðhæð hússins undir starfsemi sína.

„Framtíðarhúsnæði og húsnæðisþörf fyrir Ráðhús Hafnarfjarðar og stjórnsýslu bæjarins hefur lengi verið til umfjöllunar og greiningar innan sveitarfélagsins. Það er því mikið fagnaðarefni að ákvörðun um framtíðarhúsnæði fyrir stjórnsýsluna hafi verið tekin. Margir hafa beðið eftir ákvörðuninni og nú getum við farið af stað með þá hönnun og breytingar á húsnæðinu sem starfsemi okkar og starfsumhverfi kallar eftir,“ segir Rósa Guðbjartsdóttir.

Um er að ræða fimm hæða hús, sem inniheldur kjallara og fjórar hæðir. Það er 1521,8 fermetrar, en Hafnarfjarðarbær hefur leigt stóran hluta eignarinnar um árabil undir starfsemi sína.