Rúm­fata­lagerinn verður JYSK

Þetta kemur fram í tilkynningu frá Rúmfatalagernum. Haft er eftir Birni Inga Vilhjálmssyni, framkvæmdastjóra Rúmfatalagersins, að með því að taka upp JYSK nafnið sé vegferð búðarinnar sem hún hefur verið í undanfarin ár styrkt enn frekar.

„Fyrirtækið hefur breyst gríðarlega frá opnun árið 1987 og er í dag svo svo miklu, miklu meira en lager af rúmfötum. Það er deginum ljósara að nafnið endurspeglar ekki lengur það mikla og góða vöruúrval sem við bjóðum upp á og það liggja mikil tækifæri í að endurnýja vörumerkið okkar og byggja upp nýja ímynd af fyrirtækinu til framtíðar. Rúmfatalagerinn býður upp á mikið af fallegum vörum fyrir öll herbergi heimilisins og nafnbreytingin styður áherslur okkar á aðrar vörur en rúmföt,“ segir Björn Ingi.

„Nafnbreytingin er vissulega stór áskorun og örugglega ekki óumdeild hjá einhverjum, en við teljum þetta vera rétt og jákvætt skref fyrir okkur og viðskiptavini okkar og tengslin við JYSK sem er leiðandi á heimsvísu verða ennþá sterkari.“

Látið af notkun nafnsins Sengetøjslager annars staðar

JYSK var stofnað árið 1979 sem lágvöruverðsverslun undir nafninu JYSK Sengetøjslager og Rúmfatalagerinn hóf starfsemi hér á landi árið 1987 í samstarfi við JYSK. Allt frá stofnun hefur félagið verið í nánu samstarfi við JYSK í Danmörku sem hefur vaxið í að verða alþjóðleg verslanakeðja sem rekur yfir 3.200 verslanir í 50 löndum víðsvegar um heiminn. Á síðustu árum hefur JYSK látið af notkun nafnsins Sengetøjslager þar sem það er ekki lengur lýsandi fyrir starfsemina og er breytingin á Íslandi loka skrefið í því ferli, að því er segir í tilkynningunni.

„Þær breytingar sem við höfum staðið í á verslunum okkar á síðustu árum hafa fallið í mjög góðan jarðveg. Fyrir mér er þetta augljóst næsta skref í þróun Rúmfatalagersins. JYSK er einstakt fyrirtæki og samband okkar við JYSK gerir okkur kleift að bjóða viðskiptavinum okkar þau frábæru verð sem við getum boðið. Það er okkur mikill styrkur að vera partur af eins stórri keðju. Með þessu erum við að leggja lokahönd á að byggja upp nýja ímynd og leggja grunninn að fyrirtækjamenningu sem við höfum trú á að muni reynast fyrirtækinu og viðskiptavinum þess farsæl til framtíðar,“ segir Þórarinn Ólafsson, forstjóri Lagerinn Iceland, móðurfélags Rúmfatalagersins í tilkynningunni.

Samhliða nafnbreytingunni úr Rúmfatalagerinn í JYSK, verður verslun fyrirtækisins á Smáratorgi opnuð í nýrri mynd. Með því hafa fjórar af sjö verslunum félagsins verið endurnýjaðar og verður þeim sem eftir standa breytt á næstu misserum.