Þetta er útsýnisstaðurinn sem gosferðamenn vilja komast á

Í fréttum Stöðvar 2 voru sýndar myndir sem Björn Steinbekk tók í dag. Fimmtán dögum eftir að eldgosið hófst sýna mælingar Veðurstofunnar á óróanum að enn er mikill kraftur í eldstöðinni.

Hraunrennsli úr gígnum er enn talsvert eða um átta rúmmetrar á sekúndu. Það er þó helmingi minna en það var mest á tveimur fyrstu sólarhringum gossins.

Í dag mátti sjá að talsverður fjöldi ferðamanna var kominn upp á fjallið Litla Hrút, enda magnaður útsýnisstaður. Til að komast þangað þarf að ganga Geldingadalaleiðina, sem er talsvert á fótinn og tekur um klukkustund lengur en að ganga Meradalaleiðina, eða þrjá til fjóra tíma aðra leiðina.

Almannavarnir munu á morgun mæta með gröfu á svæðið neðan Meradala. Kanna á hvernig hraunrennsli fer með háspennulínu og niðurgrafna jarðstrengi en Verkfræðistofan Verkís kemur að verkefninu ásamt samstarfsaðilum. Á stað sem áætlað er að hraun renni yfir á að setja upp trémastur sem eftirlíkingu af mastri háspennulínu.

„Verja það með varnargarði í kring og setja línu úr því mastri líka,“ segir Ari Guðmundsson, verkfræðingur hjá Verkís.

Mæla á hitann sem kemur upp í mastrið og í línuna þegar hraunið rennur undir en einnig hitastigið á stögum sem halda mastrinu. Jafnframt verða settir niður hitamælar í jörðu til að ná hitamælingu undir rennandi hrauni til að kanna áhrif á jarðstrengi.

Þetta er í framhaldi af tilraunum sem gerðar voru með varnargarða í eldgosinu 2021. Þá voru settir upp alls fimm varnargarðar, bæði leiðigarðar og stíflur.

„Þar fengum við ákveðna þekkingu sem við búum að og getum nýtt til þess að verja vegi, ef því er að skipta,“ segir Ari.

Þegar liggja fyrir nauðsynleg leyfi frá Umhverfisstofnun, Grindavíkurbæ og landeigendum. En hversu brýnt er þetta verkefni?

„Við teljum það auðvitað afar brýnt. Því auðvitað er Reykjanesið vaknað og við gætum verið að koma að því einhvern tímann að við séum nær mikilvægum innviðum heldur en við erum núna.

Við erum í sjálfu sér á góðum stað núna. En við viljum nýta þetta tækifæri til framtíðar til þess að afla þessara upplýsinga,“ segir verkfræðingurinn.