Leigan mun tvö­faldast eftir við­gerðir

„Þangað kemur fólk sem er ekki aðeins með andlegar áskoranir heldur einnig til dæmis ýmis konar sjálfsofnæmissjúkdóma, viðkvæmt fólk. Við eigum að hlúa að þessu fólki,“ segir Pálína Sigrún Halldórsdóttir, framkvæmdastjóri Grófarinnar.

Stór hluti húsnæðisins að Hafnarstræti 95 er hvorki með loftræstingu né gluggum. Þá er loftræstingin sem til er allt of lítil, mikið af gömlum efnum í lofti og ljós orðin ónýt.

Pálína gerir ráð fyrir að það þurfi nálægt fjórum milljónum króna til að bæta húsnæðið til þess að geta nýtt það almennilega.

Kippur eftir covid

Grófin er opin, ókeypis og notendamiðuð geðræktarstöð. Hún er rekin af félagasamtökum sem stofnuð voru árið 2013. Þar starfa sjö manns við að sinna á bilinu 70 til 90 skjólstæðingum á hverjum tíma, árlega um 5.500 komur en þær eru ekki skráðar jafn formlega og í heilbrigðiskerfinu heldur með gestabók.

Að sögn Pálínu jukust komurnar mikið í og eftir covid faraldurinn, árin 2021 og 2022.

Fólkið sem þangað kemur er komið mislangt á leið í sinni endurhæfingu. Sumt fólk er komið stutt á veg, er að auka sína virkni og vantar félagslegan stuðning. Annað er komið lengra í sínu endurhæfingarferli og er komið á vinnusamninga.

Allir vilja mjög háa leigu

Húsnæðið voru áður geymslur kaupfélagsins sem skýrir hvers vegna loftgæðin eru eins og þau eru. Rýmið er býsna mikið, 360 fermetrar, en leigan er lág.

Fasteignafélagið Reitir hyggst ekki gera framkvæmdir á húsinu nema leigan hækki verulega, um 110 prósent.

„Ég er einnig búin að leita að öðru hentugu húsnæði en það er ekki um auðugan garð að gresja. Alls staðar vilja allir mjög háa leigu,“ segir Pálína.

Hún segir loftgæðin í húsinu víða mjög slök og þeir sem eru þarna allan vinnudaginn finni fyrir því, þar með talið hún sjálf. Hún tekur það þó skýrt fram að það sé enginn greindur myglusveppur í húsinu eða neitt slíkt.

Í ljósi þess að komunum hefur fjölgað þurfi Grófin á öllu plássinu að halda, en sum eru aðeins notuð tímabundið. Á meðan staðan er svona getur Grófin ekki aukið við þjónustuna.

Fyrsti styrkurinn í fyrra

Grófin nýtur stuðnings frá ríkinu en hefur ekki notið sams konar stuðnings frá Akureyrarbæ og Hugarafl fær frá Reykjavíkurborg. Fyrsti styrkurinn kom í fyrra, ein milljón króna frá velferðarráði.

Pálína segir að óskað hafi verið eftir húsnæðisaðstoð frá Akureyrarbæ á síðasta ári. Nú sé verið að skoða þann möguleika að gera þjónustusamning en ekkert er meitlað í stein.

„Það er rosalegur velvilji í samfélaginu fyrir Grófinni og allir sem vinna í þessum geira sammála um að svona staður þurfi að vera til,“ segir Pálína. Það hljóti að vera hægt að útvega fjórar milljónir króna til að tryggja viðkvæmum hópi viðunandi húsnæðisaðstæður. Hvort sem það komi úr einni átt eða fleirum.