Kostar 300.000 fyrir hvern strák að spila á HM en hægt að safna

HSÍ teflir fram landsliðum á fjórum stórmótum yngri landsliða í sumar. Kostnaður við mótin er mishár en Róbert Geir Gíslason, framkvæmdastjóri HSÍ, segir að vegna HM U21 karla þurfi leikmenn að útvega 300.000 krónur hver, af um hálfrar milljónar kostnaði sem þátttaka leikmanns í mótinu feli í sér.

Róbert segir að sama þak hafi verið sett fyrir leikmenn allra yngri landsliðanna, það er að segja 300.000 krónur, þó að kostnaður við sum mót sé hærri en við önnur. Ferðalögin séu dýr og til að mynda hafi U21-landsliðið þurft að ferðast til Grikklands en það er nú komið til Berlínar í Þýskalandi vegna 8-liða úrslitanna gegn Portúgal á morgun.

Geta safnað styrkjum hjá fyrirtækjum

U19 landslið karla spilar á HM í Króatíu í ágúst, U19-landslið kvenna spilar á EM í Rúmeníu í júlí, og U17-landslið kvenna spilar á EM í Svartfjallalandi í ágúst, og því um talsverð ferðalög að ræða.

Leikmenn geta safnað styrkjum til að vega upp á móti 300.000 króna kostnaðinum. Það gera þeir með því að safna styrkjum frá fyrirtækjum sem á móti fá merki sitt í þakklætisauglýsingu frá HSÍ eftir að mótunum lýkur.

Róbert segir að í mörgum tilfellum takist leikmönnum að safna fyrir allri upphæðinni með þessum hætti. Þátttöku á mótunum fylgi hins vegar einnig vinnutap og fleira sem geri það strembið fyrir leikmenn að taka þátt.

Langhæsta úthlutunin dugar skammt

HSÍ fær langhæstu úthlutun sérsambanda úr Afrekssjóði ÍSÍ vegna ársins 2023, samkvæmt tilkynningu sjóðsins í janúar, eða 82,6 milljónir af þeim rúmu 500 milljónum sem úthlutað var. Sú upphæð dugar þó skammt eins og fyrr segir.

Auk kostnaðar við yngri landslið þá sendi HSÍ eins og alþjóð veit karlalandsliðið á HM í Svíþjóð í janúar, og mun senda sama lið á EM í Þýskalandi í janúar. Þá sótti sambandið um boðssæti á HM kvenna sem fram fer á Norðurlöndum í desember, en ekki er ljóst hvaða þjóðir fá þau tvö boðssæti sem eru enn laus.

Að minnsta kosti þrír leikir eftir í Berlín

Íslenska U21-landsliðið heldur hins vegar áfram keppni sinni á HM í Berlín á morgun, kl. 13.45 að íslenskum tíma, með leik við Portúgal í 8-liða úrslitum, og spilar svo tvo leiki til viðbótar.

Liðið spilar nefnilega aftur á laugardaginn, annað hvort í undanúrslitum eða í keppni um 5.-8. sæti, og lokaleikir mótsins eru svo á sunnudaginn þar sem endanlega verður spilað um sæti.