Andi Svavars sveif yfir vötnum þegar Íslandsmet var slegið í tónleikahaldi

Hallgerður Kolbrún E. Jónsdóttir skrifar 27. apríl 2023 15:23

Fjöldi tónlistarfólks steig á svið í gær. Brynjar Gunnarsson

Sextíu tónlistarmenn, sem voru nánir vinir og kollegar Svavars Péturs Eysteinssonar, eða Prins Póló, stigu á svið í Gamla bíói í gær á styrktartónleikunum Hátíð hirðarinnar. Ekkja Svavars, Berglind Häsler, segir líklegt að Íslandsmet hafi verið slegið í fjölda tónlistarmanna sem kom fram á þessum fjögurra klukkustunda tónleikum.

Hátíð hirðarinnar, afmælistónleikar Prins Póló fóru fram í gærkvöldi en aukatónleikar verða í Gamla bíói í kvöld. Svavar Pétur hefði orðið 46 ára gamall í gær. Svavar lést í september eftir langa baráttu við krabbamein. Svavar ræddi baráttuna við meinið opinskátt í Íslandi í dag í nóvember 2021. Svavar kaus ávallt að láta krabbameinið ekki stjórna lífi sínu og tókst á við það af aðdáunarverðu æðruleysi og jákvæðni.

Fjölskylda Svavars hefur nú stofnað styrktarsjóð í hans nafni og mun allur ágóði af tónleikunum renna í sjóðinn.

„Þetta var algjörlega magnað og allir bara í smá sjokki. Við höldum að þetta sé Íslandsmet og megi hver sem er leiðrétta það en ég fullyrði það af því þetta voru rúmlega sextíu tónlistarmenn, fjórtán atriði á fjórum klukkutímum,“ segir Berglind Häsler, ekkja Svavars, í samtali við fréttastofu.

„Þetta er svo mikið í anda Svavars að það er pínu eins og hann hafi verið að skipuleggja þetta með okkur. Þegar við fengum þessa hugmynd í janúar hentum við hugmyndinni niður á blað og sendum á alla hvort þeir væru til í að vera með okkur og svo sögðu bara allir já.“

Þau hafi þannig bara ákveðið að kýla á þetta, og nýta sér allt það hæfileikafólk sem bauðst til að taka þátt.

„Einhverjir skynsamari en við hefðu kannski á einhverjum tímapunkti hugsað með sér: Ætli sé ekki betra að einfalda þetta? En við ákváðum að keyra þetta áfram svona. Eftir því sem nær dró runnu á okkur tvær grímur hvort tæknilega séð þetta væri hægt og að við myndum sprengja tímann eða þurfa að sleppa einhverjum. En þetta tókst upp á mínútu. Hver einasti maður var innstilltur á að láta þetta ganga.“

Áhorfendurnir hafi verið mættir stútfullir af kærleik, virðingu og jákvæðni þannig að ofurgleði ríkti í salnum.

„Svavar var maður stórra hugmynda og að láta vaða. Sá galdur gerðist í gær. Þetta var stór hugmynd sem varð að veruleika og gekk upp.“

Í kvöld verða aukatónleikar þar sem miðarnir ruku út fyrir gærkvöldið. Þar sem nokkrir listamannanna komust ekki í kvöld munu Mugison, Lay Low, Sigríður Thorlacius og Ómar Guðjónsson bætast í hópinn. Enn eru miðar til sölu fyrir þessa fjögurra klukkustunda tónlistarveislu.

Hér fyrir neðan má skoða ljósmyndir frá gærkvöldinu.