Gísli Þorgeir og félagar völtuðu yfir lærisveina Guðjóns Vals

Magdeburg er í toppbaráttu þýsku deildarinnar en Gummersbach rétt fyrir neðan miðja deild og því var um erfiðan leik að ræða fyrir gestina.

Heimaliðið var með frumkvæðið í fyrri hálfleik, leiddi 20-15 í hálfleik og hélt áfram að auka muninn eftir hlé. Magdeburg náði mest þrettán marka forskoti og sigur liðsins aldrei í hættu. Lokatölur 41-29 og tólf marka sigur heimamanna staðreynd.

Gísli Þorgeir Kristjánsson átti flottan leik fyrir Magdeburg í dag. Hann skoraði sjö mörk úr tíu skotum og gaf þar að auki þrjár stoðsendingar. Elliði Snær Viðarsson skoraði þrjú mörk fyrir Gummersbach og Hákon Daði Styrmisson eitt.

Í Flensburg skoraði Teitur Örn Einarsson eitt mark fyrir heimamenn sem unnu 34-27 sigur á Lemgo. Teitur Örn nýtti sitt eina skot í leiknum en Flensburg leiddi 17-13 í hálfleik og vann sjö marka sigur að lokum.

Elvar Örn Jónsson skoraði fimm mörk fyrir Melsungen sem gerði 26-26 jafntefli á útivelli gegn Hannover-Burgdorf. Elvar Örn átti sinn þátt í stigi Melsungen því hann minnkaði muninn í 26-25 einni mínútu fyrir leikslok áður en Timo Kastening jafnaði metin hálfir mínútu síðar.

Arnar Freyr Arnarsson komst ekki á blað hjá Melsungen í leiknum.