Svara fyrir vopnaða árás í Borgar­holts­skóla sem olli miklum óhug

Fjórir af sakborningunum eru ákærðir fyrir sérstaklega hættulega líkamsárás og þá er einn þeirra ákærður fyrir líkamsárás. Fjórir úr hópnum eru 20 ára eða yngri og sá fimmti er tæplega þrítugur. 

Þrír voru handteknir í tengslum við árásina í Borgarholtsskóla og voru piltarnir á aldrinum sextán til nítján ára. Einn þeirra var í kjölfarið úrskurðaður í gæsluvarðhald. 

Sex þurftu að leita aðstoðar á slysadeild eftir átökin en mikill viðbúnaður lögreglu, sérsveitar og sjúkraflutningamanna var á staðnum. Þá var myndböndum af árásinni dreift á samfélagsmiðlum. Árásin olli miklum óhug í samfélaginu og velti upp spurningum um öryggi innan veggja skóla hér á landi.

Sakborningar huldu höfuð sín við komuna í héraðsdóm á mánudag að frátöldum Gabríel Douane sem gaf ljósmyndara fréttastofu skýr skilaboð þegar hann mætti til þingsins með löngutöng á lofti. Einn sakborninganna gaf skýrslu frá Akureyri þar sem hann var veðurtepptur.

Til viðbótar er Gabríel ákærður fyrir tvær líkamsárásir í fangelsinu á Hólmsheiði. Önnur árásin var á fanga og hin árásin á fangavörð. Myndbandsupptökur eru til af árásunum og voru spilaðar við aðalmeðferð málsins á mánudaginn.

Gabríel hefur komist áður í fréttirnar en hann strauk úr haldi lögreglu í héraðsdómi í fyrra. Töluverð leit var gerð að Gabríel áður en lögregla hafði aftur hendur í hári hans.

Spennuþrungið andrúmsloft

Dómari í málinu ávarpaði viðstadda í dómsal á mánudagsmorgun og sagði fjölmiðlaumfjöllunarbann ríkja um það sem fram kæmi við skýrslutökur í dómsal þar til skýrslutökum í málinu væri lokið. Um er að ræða heimild dómara sem varð að meginreglu með breytingu laga með frumvarpi dómsmálaráðherra árið 2019. Dómstólar hafa ákveðið að túlka breytt lög þröngt undanfarnar vikur og meinað fjölmiðlum að greina frá gangi mála fyrr en að öllum skýrslutökum loknum.

Ákærðu gáfu allir skýrslu í málinu á mánudag. Auk þeirra hefur nokkur fjöldi komið fyrir dóminn og aðrir gefið skýrslu í gegnum fjarfundarbúnað. Lögreglumenn, kennarar, nemendur og læknar eru á meðal þeirra sem gefa skýrslu fyrir dómi.

Samkvæmt heimildum fréttastofu hefur andrúmsloftið í dómsal verið þrungið spennu. Foreldrar sakborninga voru í salnum á mánudaginn. Þeir sjá hlutina ólíkum augum.

Athygli vakti að málið var ekki á dagskrá héraðsdóms á mánudaginn þótt um opið þinghald sé að ræða. Má telja líklegt að vegna þessa hafi Vísir einn fjölmiðla verið með fulltrúa þegar ákærðu gáfu skýrslu. Vísir sendi fyrirspurn á dómstjóra við Héraðsdóm Reykjavíkur á mánudag vegna þessa. Fréttin verður uppfærð ef svar berst.

Uppgjör tveggja hópa

Fram hefur komið að átökin virðist hafa verið hluti af uppgjöri milli tveggja hópa. Fram kemur í ákæru að slagsmálin hafi byrjað á salerni skólans þar sem tveir úr hópnum eru sagðir hafa ráðist á einn úr hinum hópnum. 

Sá hafi brugðist við með því að lemja annan árásarmanninn ítrekað með skralli sem vegi um hálft kíló að þyngd. Slagsmálin hafi síðan færst niður í anddyri skólans og endað fyrir utan hann.

Móðir drengs sem ráðist var á í árásinni í Borgarholtsskóla sagði í samtali við Vísi á sínum tíma að sonur hennar hefði sætt hótunum um mánaða skeið og þær byrjað eftir að hann stöðvaði árás annars drengs á unga stúlku. Hann hafi svo heyrt af því að til stæði að ráðast á sig með hnífi og kallað bróður sinn til aðstoðar. Bróðirinn hafi reynt að miðla málum en það hafi ekki gengið eftir og slagsmál hafi brotist út.

Synir hennar hefðu verið talsvert lemstraðir og með djúpa skurði á höfði. Drengirnir hafi ráðist á syni hennar með vopnum, hafnaboltakylfu og hnífum. Einnig hafi annar nemandi handleggsbrotnað eftir að hafa komið sonum hennar til aðstoðar.

Uppfært klukkan 11:27

Fram kom í máli dómara í morgun að málið hefði ekki verið birt á dagskrá dómsins á mánudag fyrir mistök. Mistök sem séu reglulega gerð. Þá náðist ekki að ljúka vitnaleiðslum í dag en stefnt á að gera það á morgun. Dómari ítrekaði bann við öllum efnislegum fréttaflutningi þangað til öllum vitnaleiðslum væri lokið.