Átta milljónir pítsa pantaðar í Domino‘s-appinu á tíu árum

Þetta kemur fram í tilkynningu frá Domino’s en tíu ár eru í dag liðin frá því að appið var tekið í notkun.

Þar segir að 95 prósent af veltu fyrirtækisins fari nú gegnum vefinn eða appið sem hafi verið unnið í samstarfi við huðbúnaðarfyrirtækið Stokk. Að sama skapi hefur fækkað mjög tilfellum þar sem viðskiptavinir hringi í þjónustuver til að panta pítsu.

Haft er eftir Magnúsi Hafliðasyni, forstjóra Domino‘s á Íslandi að þetta sé mikil breyting frá því sem áður var. Hann segir yngri viðskiptavini fyrirtækisins hringja síður og borga frekar fyrirfram.

„Hjá yngri viðskiptavinum eru stafrænar leiðir náttúrulegt fyrsta val, bæði við pöntun og almenna þjónustu, og sjáum við það einnig hvað varðar nýtingu á vefspjalli. Eins gott og símanúmerið okkar er þá er það ekki brennt í minni þeirra eins og hjá eldri kynslóðum.“

Ennfremur segir í tilkynningunni að yfir átta milljónir pítsa á tíu árum þýði að að meðaltali sé send inn ein og hálf pöntun á hverri mínútu allt árið um kring.