„Einkennist af því að við erum með ellefu algjör dauðafæri sem við misnotum“

„Þetta eru gríðarleg vonbrigði og ég vil bara fyrst segja að við töpum þessum leik eftir hetjulega baráttu og ég vil hrósa leikmönnunum fyrir það að þeir gáfu allt í þetta,“ sagði Guðmundur að leik loknum.

„Við sýndum stórt íslenskt hjarta allan tíman inni á vellinum. Það var auðvitað áfall fyrir okkur að missa Ómar [Inga Magnússon] út og við vissum svo sem að það gæti gerst. Við vissum að það gæti allt gerst með hann og svo dettur Aron [Pálmarsson] út í hádeginu getum við sagt. Það var verið að testa hann og athuga hvort þetta gæti gengið. Það er auðvitað áfall fyrir okkur því þetta eru tveir af bestu leikmönnum liðsins.“

 „En síðan finnst mér við gera þetta - fyrir utan kannski fyrstu 5-7 mínúturnar - þá spilum við stórkostlegan fyrri hálfleik. Ég hafði mjög góða tilfinningu fyrir þessu, en þeir ná að koma til baka og það er eins og það er svo sem. Síðan byrjum við seinni hálfleik á því að misnota tvö upplögð dauðafæri og í staðin fyrir að koma okkur í jafna stöðu þá sigla þeir frá okkur.“

„Síðari hálfleikur einkennist af því að við erum með ellefu algjör dauðafæri sem við misnotum á móti Palicka. Það er raunverulega bara allt of mikið. Það þolir ekkert lið slíkt og við erum að tala um gegnumbrot, skot af línu og hornaskot. Það bara því miður gengur ekki upp.“

Fyrir mótið ætlaði íslenska liðið sér klárlega að komast í átta liða úrslit, en eftir tapið í kvöld er sá draumur orðinn nokkuð fjarlægur. Liðið þarf að vinna Brasilíu á sunnudaginn og treysta á hagstæð úrslit í hinum tveimur leikjum riðilsins. Guðmundur vill þó ekki endilega meina að liðið hafi fallið á prófinu.

„Þú getur orðað þetta eins og þú villt. Falla á prófum og allt það, ég ætla ekkert að tala um það. Þetta er bara mjög erfitt verkefni. Við klikkum finnst mér á stuttum tíma í leiknum á móti Ungverjum og erum að lenda í því þar líka að við erum að misnota upplögð tækifæri.“

„Við vorum búnir að undirbúa það að pressa á liðin og erum búnir að vera að því og höfum sjálfir talað vel um liðið og aðrir mjög duglegir við það að tala liðið upp. Það er bara eins og það er og menn verða bara að meta það hvernig þeir líta á það.“

„En mér finnst þetta raunverulega miðað við það sem er búið af mótinu þá er þetta örstuttur kafli til þess að gera á móti Ungverjum sem við erum komnir í ákjösanlega stöðu en nýtum það ekki. Það er auðvitað umhugsunarefni. Síðan núna aftur þá misnotum við aftur og við þurfum náttúrulega að læra af því. Það er gríðarlegur munur á markvörslunni í þessum leik og síðan öll þessi færi sem eru að fara og allir þessir tæknifeilar líka. Þetta eru allt of margar sóknir sem fara.“

„Mér fannst á köflum þegar við náðum að spila vörnina þá fannst mér þetta mjög gott. Þetta var bara mjög erfitt verkefni á móti Evrópumeisturunum á heimavelli og menn geta alveg sagt hvað þeir vilja um það, en þetta var mjög erfitt dæmi.“

Eins og áður segir voru væntingarnar sem gerðar voru til íslenska liðsins miklar, en þeim hefur nú verið kippt niður á jörðina. Guðmundur segir að mögulega hafi fólk farið fram úr sér í væntingum og markmiðasetningu.

„Kannski einhverjir, ég veit það ekki. Ég sjálfur er nú búinn að benda á það hvernig þetta er. Þetta er mjög erfitt og góð lið við að etja. Við fáum Ungverjana snemma og þeir eru frískir þá. Við erum með stórkostlegan leik í sirka 45 mínútur og það er svona það sem maður svekkir sig á. Það getur vel verið og það hefur mjög oft verið þannig, og ég hef fylgst með því, að þegar væntingarnar vaxa svona ógurlega að og allir keppast við að tala liðið upp - það er gott að fá athygli og við erum ekkert að kvarta yfir því - en það þarf bara helling til að standa undir slíku. Mér fannst bara vanta herslumuninn til að við hefðum verið í betri stöðu þegar við erum að koma inn í þennan milliriðil og að við hefðum ekki þurft að vera með þetta núna að þurfa að ná í eitt stig eða tvö á móti Svíum á heimavelli,“ sagði svekktur Guðmundur Guðmundsson að lokum.