„Einhverjir áratugir síðan það hefur komið svona mikill snjór“

Frá því í gærkvöldi hefur lægð gengið yfir landið og hefur mikil snjókoma fylgt. Þjóðveginum var lokað í þó nokkur tíma á milli Hvolsvall­ar og Kirkju­bæj­arklaust­urs. Lokanir síðustu daga og þung færð farnar að hafa áhrif á íbúa í Mýrdalshreppi.

„Í Víkinni er það sérstaklega mikið fannfergi og alls ekki fólksbílafært innanbæjar,“ segir Einar Freyr Elínarson sveitarstjóri Mýrdalshrepps.

Fannfergi hefur verið víða um land í dag og hafa björgunarsveitir verið kallaðar út til að aðstoða fólk í vanda. Búist er við að lægðin gangi niður í kvöld. Kuldi er þó áfram í kortunum og gular viðvaranir á morgun.

Einar segir ítrekaðar vegalokanir mjög íþyngjandi fyrir íbúa á svæðinu. Samfélagið geti hæglega orðið af tugum milljóna króna fyrir hvern dag sem að loka þarf vegum í tapaðri gistingu eða sölu á þjónustu og veitingum. Þess vegna þurfi samgöngur að vera greiðar eins og kostur er. Hann telur að það geti tekið tíma að koma samgöngum á svæðinu í eðlilegt horf.

„Það eru einhverjir áratugir síðan það hefur komið svona mikill snjór í Vík þannig að við verðum einhvern smátíma að því.“

Mikið hefur mætt á björgunarsveitum en á jóladag festi rútubílstjóri meðal annars rútu sína í tvígang í Mýrdalshrepp eftir að hafa ekki virt lokanir

„Það er auðvitað mikil mildi raunverulega að það hafi ekki orðið slys á fólki þegar óvanir ferðamenn, sem að eðlilega, eru áfjáðir að geta haldið ferðinni sinni áfram ana út jafnvel fótgangandi í blindbyl.“

Þeir sem koma að ferðaþjónustu segja mikilvægt að tryggja góða upplýsingagjöf til ferðamanna sér í lagi yfir vetrartímann. Ferðaþjónustuaðilar hafi staðið sig nokkuð vel en sumir séu á eigin vegum og misvel gangi að ná til fólks. Skoða þurfi hvort hægt sé að gera betur.

„Við þurfum að uppfæra okkar viðbrögð og undirbúning. Samskiptin á milli viðbragðsaðila og þeirra sem eru að vinna í bransanum. Hvort hægt er að gefa upplýsingar til dæmis um lokanir og annað með einhvers konar betri fyrirvara eða fyrirsjáanleika um það hvenær verði opið eða opnað aftur og svo framvegis. Þetta er allt eitthvað sem við þurfum bara að hafa í sífelldri vinnslu,“ segir Jóhannes Þór Skúlason framkvæmdastjóri Samtaka ferðaþjónustunnar.