Pútín viðurkennir vandræði og styður stækkun hersins

Þetta er meðal þess sem forsetinn sagði í ræðu á fundi ráðuneytisins í gær en hann hét því að Rússar myndu halda áfram að berjast í Úkraínu og að markmiðum hinnar „sértæku hernaðaraðgerðar“, eins og Pútín kallar innrásina, yrði náð.

Pútín viðurkenndi að innrásin í Úkraínu hefði opinberað vandamál innan rússneska hersins og sagði að laga þyrfti þau. Meðal annars nefndi hann samskiptavandamál og vandræði með gagn-stórskotaliðsárásir.

Forsetinn nefndi dróna sérstaklega og sagði þá hafa spilað stóra rullu í innrásinni. Fjölga þyrfti þeim og gera þyrfti dróna sem hægt væri að nota til að stýra stórskotaliðsárásum.

Sagði engu sparað til

Pútín talaði einnig um fregnir af því að hermenn væru sendir á víglínurnar á grunnbúnaðar eins og sjúkrakassa, matvæla og búninga og sagði hann að ganga þyrfti úr skugga um að svo væri ekki gert.

Hann sagði að engu yrði sparað til svo herinn myndi bera sigur úr býtum í Úkraínu. Í ræðu sinni hélt Pútín því fram að Rússar væru svo gott sem að berjast við allt Atlantshafsbandalagið.

Ríki NATO og önnur ríki á Vesturlöndum hafa staðið við bakið á Úkraínumönnum og meðal annars sent þeim fjármuni, nauðsynjar, hlífðarbúnað og vopn.

Vólódímír Selenskí, forseti Úkraínu, var staddur í Bandaríkjunum í gær og hélt hann meðal annars ræðu í bandaríska þinginu. Þar kallaði hann eftir frekari vopnasendingum til Úkraínu, eins og Úkraínumenn hafa ávallt gert, og sagði að ekki væri um ölmusu að ræða. Þess í stað væru Vesturlönd að fjárfesta í öryggi og lýðræði.

Sjá einnig: Ekki ölmusa heldur fjárfesting í öryggi og lýðræði

Hann sagði Úkraínumenn deila sömu gildum og Bandaríkjamenn og að þeir væru að berjast fyrir sameiginlegum sigri gegn valdníðslu Rússa.

„Við munum sigra og mig langar að við sigrum saman.“

Samkvæmt frétt New York Times líkti Pútín rússneskum hermönnum í Úkraínu við „hetjurnar“ sem vörðu Rússland gegn innrás Napóleóns árið 1812 og Hitlers árið 1945 og gaf í skyn að innrás Rússa í Úkraínu snerist um tilvist Rússlands.

TASS fréttaveitan, sem er í eigu rússneska ríkisins, hefur eftir Sergei Shoigu, varnarmálaráðherra, að Úkraínumenn hafi orðið fyrir gífurlegu mannfalli og þau stór hluti þeirra vopnakerfa sem úkraínski herinn hafi búið yfir í upphafi innrásarinnar hafi verið eyðilagður.

Rússar hafa lítið sagt um eigið mannfall. Starfsmenn Varnarmálaráðuneytisins gáfu síðast út tölur í september en þá var því haldið fram að 5.937 hermenn hefðu fallið. Ráðamenn á Vesturlöndum hafa sagt um nokkra vikna skeið að talið sé að um hundrað þúsund rússneskir hermenn hafi fallið eða særst í Úkraínu.

Tölurnar eru sagðar svipaðar hjá Úkraínumönnum, fyrir utan þær þúsundir óbreyttra borgara sem hafa fallið vegna innrásarinnar.

Shoigu sagði einnig að innrásin hafi sömuleiðis sýnt fram á fagmennsku yfirmanna í hernum og vilja almennra hermanna til að ná markmiðum þeirra við mjög svo erfiðar aðstæður.

Vilja fjölga hermönnum um helming

Breyta á aldursbili þeirra sem kvaddir eru í herinn úr 18 til 27 í 21 til 30. Þá á að fjölga hermönnum úr um milljón í upphafi þessa árs í um eina og hálfa milljón en ekkert var sagt um hvenær ná ætti þessu markmiði, samkvæmt AP fréttaveitunni.

Pútín gaf í ágúst út skipun um að hermönnum yrði fjölgað í 1,15 milljón og í kjölfarið að skikka ætti þrjú hundruð þúsund menn til herþjónustu. Sá hópur er nú talinn meðal rússneskra hermanna.

Samhliða þessu á að stofna nýjar herdeildir sem eiga að verða skipaðar nýjum hermönnum. Þessar herdeildir eiga meðal annars að hafa höfuðstöðvar nærri landamærum Rússlands og Finnlands, vegna væntanlegrar inngöngu Svíþjóðar og Finnlands í Atlantshafsbandalagið.

Hafa reynt að fjölga hermönnum í nokkur ár

Forsvarsmenn rússneska hersins hafa reynt að byggja upp blandaðan her atvinnuhermanna og hóps manna sem kallaðir eru til herskyldu tvisvar sinnum á ári og þjóna herskyldu ár í senn. Þessi hópur á að vera skipaður um 250 þúsund mönnum og mega þeir ekki taka þátt í bardögum utan landamæra Rússlands án formlegrar stríðsyfirlýsingar.

Atvinnuhermönnum hefur þó ekki fjölgað nóg farið fækkandi í Rússlandi á undanförnum árum, samkvæmt grein tveggja sérfræðinga um málefni rússneska hersins frá því í sumar.

Shoigu sagði að fjölga ætti atvinnuhermönnum í tæplega sjö hundruð þúsund en fyrir lok næsta árs ættu þeir að vera orðnir 521 þúsund talsins.

Árið 2019 voru rússneskir atvinnuhermenn 394 þúsund talsins og 405 þúsund árið 2020, sem var síðasta þegar upplýsingar um fjölda þeirra voru opinberaðar. AP segir að þegar innrásin hófst í febrúar hafi um fjögur hundruð þúsund atvinnuhermenn verið í rússneska hernum.

Frá því innrásin hófst hafa fregnir ítrekað borist af því að ungir menn sem hafi verið skikkaðir til herþjónustu hafi verið þvingaðir til að skrifa undir atvinnusamning.