Sparkaði og skallaði lög­reglu­menn og hótaði þeim í­trekað líf­láti

Ákæra í málinu var í fjórum liðum en áttu árásirnar sér stað á tímabilinu september 2021 til janúar á þessu ári. 

Fyrsta brotið sneri að því að maðurinn hafi ítrekað hótað tveimur lögreglumönnum líkamsmeiðingum og lífláti, fyrst í lögreglubíl og svo inni á lögreglustöð við Hverfisgötu í september 2021.

Um einum og hálfum mánuði síðar skallaði maðurinn svo lögreglumann með þeim afleiðingum að sá hlaut heilahristing og bólgu yfir vinstri augabrún. Hann hafði þá sömuleiðis hótað lögreglumanninum og félaga hans líkamsmeiðingum og lífláti.

Tveimur vikum síðar réðst maðurinn svo á lögreglumann við íbúð í Kleppsveg í Reykjavík með því að sparka í höfuð hans með hnénu þannig að lögreglumaðurinn hlaut mar á eyra.

Í janúar síðastliðinn skallaði maðurinn svo lögreglumann fyrir utan sömu íbúð við Kleppsveg þannig að hann hlaut mar á enni. Maðurinn hafði þá líka haft í hótunum við lögreglumennina sem voru á vettvangi.

Maðurinn játaði brot sín skýlaust. Hann hefur einu sinni áður gengist undir lögreglustjórasátt vegna umferðarlagabrots og við ákvörðun refsingar var litið til þess að um nokkur tilvik hafi verið að ræða auk þess að árásirnar hafi verið alvarlegar og beinst að höfði lögreglumannanna.

Dómari mat hæfilega refsingu vera sex mánaða fangelsi, en fullnustu hennar er frestað og mun hún niður falla, haldi maðurinn almennt skilorð í tvö ár. Manninum var jafnframt gert að greiða málsvarnarþóknun skipaðs verjanda og sakarkostnað, alls um 350 þúsund krónur.