Sex skotnir til bana eftir um­sátur á af­skekktum bæ í Ástralíu

Fjórir lögreglumenn voru kallaðir að húsinu sem er í Chinchilla, tæplega þrjú hundruð kílómetra fjarlægð frá borginni Brisbane en þeir voru að líta eftir manni sem saknað var.

Þegar lögreglumennirnir nálguðust húsið hófst skothríð og létu lögregluþjónarnir Matthew Arnold og Rachel McCrow lífið. Þriðji lögreglumaðurinn særðist lítillega og sá fjórði slapp heill á húfi.

Maður sem bjó í næsta húsi fór að grennslast fyrir um lætin og var sá einnig skotinn til bana.

Fleiri lögreglumenn bar síðan að garði og upphófst nokkurskonar umsátursástand sem stóð í nokkra klukkutíma.

Að lokum voru hin grunuðu, maður og kona skotin til bana en einnig maðurinn sem lögregla leitaði að. Sá var 46 ára gamall skólastjóri sem ekkert hafði spurst til í nokkurn tíma. Fólkið á bænum var síðan bróðir skólastjórans og kona hans.

Bróðirinn hafði margsinnis komist í kast við lögin en hann var ákafur andstæðingur hinnar hörðu byssulöggjafar sem sett var í Ástralíu eftir fjöldamorð sem framin voru í Tasmaníu árið 1996.