Engin óeining innan raða VR

Það stendur ekki til að VR gangi úr Al­þýðu­sam­bandi Ís­lands eins og er.

Ragnar Þór Ingólfs­son, for­maður VR, hefur undan­farnar vikur og mánuði velt upp þeirri spurningu hvort VR sé betur borgið utan ASÍ og þá dró hann fram­boð sitt til for­seta ASÍ til baka í síðustu viku og gekk út af þingi sam­bandsins.

Hann í­trekar nú að ekki sé á dag­skrá eins og er að ganga með fé­lagið úr sam­bandinu.

„Öll um­ræða um Al­þýðu­sam­bandið verður bara að bíða betri tíma og hún verður bara tekin þegar að rykið fer að setjast og hlutirnir róast. Þá munum við bara ræða það í okkar tíma,“ segir Ragnar Þór.

Fé­lagið mun nú ein­göngu ein­beita sér að kjara­samningum sem verða lausir um mánaða­mótin.

Samninga­nefndir VR og Sam­taka at­vinnu­lífsins hittast á morgun á form­legum fundi.

Ragnar segir þó að á endanum muni VR ræða fram­tíð sína innan ASÍ.

„Jú, jú, auð­vitað munum við þurfa að fara svona yfir stöðuna og bara gera það með okkar stjórn og okkar trúnaðar­ráði. Ég get svo sem ekkert sagt til um hvað kemur út úr því sam­tali en við erum bara núna að ein­beita okkur að kjara­samningunum fyrst og fremst,“ segir Ragnar Þór.

Skiptar skoðanir en sameinuð forysta

Morgun­blaðið greindi frá því í morgun að kurr væri innan VR vegna þessara hug­mynda formannsins. Sjö stjórnar­menn VR af 15 hefðu setið eftir á þinginu þegar Ragnar gekk þaðan út á mið­viku­daginn.

Heimildir frétta­stofu herma hins vegar að innan stjórnarinnar sé enginn á­greiningur og stjórnar­mennirnir hafi setið eftir til að ljúka sínu starfi í ýmsum nefndum og sam­ræðu­hópum.

Ragnar tekur einnig fyrir að ó­eining sé innan stjórnarinnar.

„Auð­vitað eru skiptar skoðanir innan okkar raða en við erum sam­heldinn hópur og okkur hefur gengið alveg gríðar­lega vel þannig að það var enginn klofningur þar,“ segir Ragnar Þór.

Samkvæmt heimildum fréttastofu er stjórnin alls ekki mótfallin því að umræðan um framtíð VR innan ASÍ.

Nýr for­maður verður kjörinn innan VR í mars á næsta ári. Ragnar segist ekki hafa tekið neina á­kvörðun um hvort hann ætli að sækjast eftir á­fram­haldandi setu sem for­maður eftir að hann hætti við fram­boð til for­seta­em­bættis Al­þýðu­sam­bandsins.