Finna ekki vagnstjóra sem á að hafa verið ógnað með hníf

Þetta kemur fram í tilkynningu frá lögreglu. Jóhannes Svavar Rúnarsson, framkvæmdastjóri Strætó, segist í samtali við fréttastofu ekki geta veitt frekari upplýsingar um málið þar sem honum hafi ekki tekist að finna umræddan vagnstjóra. „Það er enginn sem kannast við þetta á vaktinni hjá okkur í stjórnstöðinni. Ég setti af stað leit að þessu en við höfum ekki fundið þetta.“

Sýnt ógnandi hegðun eftir grunaðan þjófnað

Lögreglu var einnig tilkynnt um yfirstandandi innbrot fyrr í dag en þegar laganna verðir komu á vettvang reyndist gerandinn vera ofurölvi og áttavilltur, að því er fram kemur í dagbók lögreglu. Var þeim ölvaða í kjölfarið ekið heim til sín.

Lögreglustöðinni á Hverfisgötu barst sömuleiðis tilkynning um ógnandi mann en þegar lögregla fann umræddan einstakling kom í ljós að hann var einnig grunaður í þjófnaðarmáli fyrr um daginn. Að sögn lögreglu fannst eitthvað af þýfinu á honum en öðru hafði hann komið undan. Einstaklingurinn var vistaður í fangageymslu vegna málsins.

Minnst fjórir ökumenn voru stöðvaðir á höfuðborgarsvæðinu í dag grunaðir um akstur undir áhrifum áfengis og/eða fíkniefna.

Fréttin hefur verið uppfærð með svörum frá framkvæmdastjóra Strætó.