Trump hæstánægður með LIV-mótaröðina og vini sína í Sádí-Arabíu

Þriðja mót LIV-mótaraðarinnar fer fram á Trump National golfvellinum í New Jersey um helgina. Trump spilaði æfingahring á vellinum í gær og eftir hann lýsti hann yfir hrifningu sinni á LIV-mótaröðinni.

„Ég hef þekkt þetta fólk í Sádí-Arabíu lengi. Þeir hafa verið vinir mínir í mörg ár og hafa fjárfest í mörgum bandarískum fyrirtækjum,“ sagði Trump. „Það sem þeir eru að gera fyrir golfið og kylfinga er svo frábært. Launin munu rjúka upp.“

Meðal þeirra sem hafa gagnrýnt LIV-mótaröðina eru fjölskyldur fólks sem lést í hryðjuverkunum 11. september 2001. Trump gerði lítið úr tengslum Sádí-Arabíu við 9/11.

„Því miður hefur enginn hefur komist til botns í 9/11, eins og þeir hefðu átt að gera hvað varðar þessa brjálæðinga sem gerðu þessa hræðilegu hluti við borgina okkar, landið okkar og heiminn allan. Enginn hefur komist þangað,“ sagði Trump.

„En ég get sagt ykkur að það er fullt af frábæru fólki þarna úti í dag og við ætlum að skemmta okkur vel og fagna. Miklir fjármunir fara í góðgerðarmál og þarna verða margir af bestu kylfingum heims.“

Mótið í New Jersey er það þriðja á LIV-mótaröðinni. Charl Schwartzel vann það fyrsta og Branden Grace annað. Þeir koma báðir frá Suður-Afríku.