Er­lendir ferða­menn greiði gjald en ekki Ís­lendingar

Þetta kemur fram í nýrri könnun Fréttablaðsins. Sjötíu og tvö prósent aðspurðra segjast þar vera fylgjandi því að erlendir ferðamenn greiði fyrir aðgang að náttúruperlum, á sama tíma og aðeins þrjátíu prósent eru fylgjandi því að Íslendingar greiði fyrir slíkt.

Tólf prósent segjast mótfallin því að erlendir ferðamenn greiði gjald á slíkum stöðum, en 54 prósent þegar kemur að Íslendingum. Ekki munar miklu á afstöðu fólks hvort það búi á höfuðborgarsvæðinu eða á landsbyggðinni, en stuðningur við gjaldtöku er almennt minnstur í yngsta aldurshópnum og hækkar með hækkandi aldri.

„Unnið verður að breytingum á fyrir­komu­lagi gisti­n­átta­gjalds í sam­vinnu við greinina og sveitar­fé­lögin með það að mark­miði að sveitar­fé­lögin njóti góðs af gjald­tökunni,“ sagði Lilja Alfreðsdóttir, ferðamálaráðherra í svari við fyrirspurn Fréttablaðsins um gjaldtöku í ferðamannaiðnaði. Fyrirhugað væri að ráðast í tekjuöflun af ferðamönnum frá og með 2024 sagði einnig í svari hennar.

Könnunin var framkvæmd dagana 22. júní til 4. júlí á netinu. Úr­takið var 2.000 ein­staklingar 18 ára og eldri og svar­hlut­fallið 50,8 prósent.