Hrun Njarðvíkinga í fjórða farið að minna á sára sópið frá 2004

Það er einkum fjórði leikhlutinn sem hefur farið illa með Njarðvíkinga í þessu undanúrslitaeinvígi. Mikið hefur verið rætt um aldur sumra lykilmanna liðsins og það er eins og ákefðin og álagið sé of mikið fyrir marga þeirra þegar líður að lok leikja.

Njarðvíkingar hafa þannig unnið fyrstu þrjá leikhlutana í einvíginu með samtals tuttugu stiga mun og það ætti nú að vera nægt veganesti í lokaleikhlutann.

Stólarnir hafa hins vegar sýnt mikinn styrk með því að snúa báðum leikjum í lokaleikhlutann. Þeir unnu upp átján stiga forskot í fjórða leikhlutanum í síðasta leik og leikinn loks í framlengingu.

Þetta þýðir það að Njarðvíkingar eru úr leik tapi þeir í kvöld en leikurinn verður sýndur beint á Stöð 2 Sport. Upphitun Subway Körfuboltakvölds hefst klukkan 19.40 en leikurinn klukkan 20.15.

Þróun þessa einvígis er farin að minna á annað sárgrætilegt einvígi fyrir Njarðvíkinga frá árinu 2004. Þeir töpuðu þá 3-0 í undanúrslitaeinvígi á móti Snæfelli.

Njarðvík vann fyrstu þrjá leikhlutana í því einvígi með 35 stigum en missti mikið forskot niður í lokaleikhlutanum í öllum einvígunum.

Njarðvík var reyndar bara einu stigi yfir fyrir fjórða leikhlutann í fyrsta leiknum en klúðrið var í leik tvö og þrjú.

Í leik tvö misstu Njarðvíkingar niður fjórtán stiga forskot í fjórða leikhluta og var síðan sópað í sumarfrí eftir að hafa tapað niður tuttugu stiga forystu í fjórða leikhlutanum í þriðja leiknum.

Nú verður fróðlegt að sjá hvort Njarðvíkingar geti snúið við blaðinu, haldið út heilan leik og tryggt sér annan leik á Króknum.