Ógnvænlegur sóknardúett nái þær að spila sig saman

Valur hefur titilvörnina á þriðjudag þegar spútniklið síðasta tímabils, Þróttur Reykjavík, heimsækir Hlíðarenda. Eftir að hafa farið í gegnum riðil sinn í Lengjubikarnum með fullt hús stiga tapaði Valur nokkuð óvænt 3-0 gegn Stjörnunni í undanúrslitum en tókst svo að vinna Meistarakeppni KSÍ þökk sé vítaspyrnukeppni.

Þær Elín Metta Jensen og Bryndís Arna Níelsdóttir spiluðu ekki mínútu saman í leikjunum tveimur en mikil spenna ríkir fyrir mögulegu samstarfi þeirra í sumar. Bryndís Arna kom frá Fylki að loknu síðasta tímabili og þrátt fyrir ungan aldur hefur hún sýnt að hún gæti orðið með betri framherjum deildarinnar þegar fram líða stundir. 

Elínu Mettu þarf vart að kynna fyrir landanum en hún hefur skorað samtals 185 mörk í 245 leikjum fyrir Val. 

Vísir ræddi við nokkra sérfróða aðila um mögulegt samstarf þeirra tveggja og hvort varnarmenn annarra liða ættu að missa svefn ef þær ná að stilla strengi er líður á sumarið. Takist það þá er voðinn vís en þær hafa ekki náð að spila mikið saman í vetur.

„Ekki haft svona öflugan dúett í mörg ár“

„Við erum auðvitað öll að vona að Elín Metta verði með að fullu í sumar. Hefur ekki verið mikið með á undirbúningstímabilinu en hefur spilað síðustu leiki og virðist vera komin á fullt,“ sagði Helena Ólafsdóttir, sérfræðingur Stöðvar 2 Sport um Bestu deild kvenna. 

„Ég er svo alveg sammála því að við höfum ekki haft svona öflugan dúett í mörg ár, hvað þá svona öfluga og ólíka leikmenn saman í liði. Það er eitthvað sem Pétur Pétursson (þjálfari Vals) gæti svo sannarlega nýtt sér. Persónulega hefur mér alltaf fundist Elín Metta vera meira „handandi framherji“ eða hola frekar en pjúra níu og því væri mjög öflugt að vera með Bryndísi Örnu fremsta,“ bætti Helena við.

„Væri til í að sjá Pétur fara í gamla góða 4-4-2“

Sonný Lára Þráinsdóttir, margfaldur Íslandsmeistari með Breiðabliki og sérfræðingur Stöðvar 2 Sport í sumar, tekur í sama streng.

„Það verður mjög gaman að fylgjast með samstarfi Bryndísar Örnu og Elínar Mettu hjá Val í sumar. Ég vona innilega að þær fái tækifæri til að spila saman upp á topp. Ég væri til í að sjá Pétur fara í gamla góða 4-4-2 leikkerfið.“

„Það hefði verið gott fyrir þær að nýta undirbúningstímabilið í að slípa sig saman en það gekk ekki. Ef þær fá hins vegar tækifæri í byrjun móts til að stilla saman strengi og ná að tengja vel saman þá er augljóst að báðar munu skora töluvert af mörkum í sumar,“ sagði Sonný Lára einnig.

„Eru auðvitað mjög ólíkar“

Að lokum ræddi Vísir við Eið Ben, fyrrverandi þjálfara Vals sem þjálfar í dag Þrótt Vogum í Lengjudeild karla. Hann er mjög spenntur fyrir samstarfi þeirra Elínar Mettu og Bryndísar Örnu en hann er ekki alveg sammála Helenu hvor eigi að spila sem fremsti maður ef Pétur ákveði að spila með eina frammi og hina á bakvið.

„Það er spurning hvernig liðið yrði þá stillt upp, Pétur gæti farið í 4-4-2, eitthvað sem við gerðum einstaka sinnum undanfarin þrjú ár. Eða þá - það sem mér finnst líklegra - að hann haldi sig við 4-2-3-1 þar sem Bryndís Arna verður fyrir aftan Elínu Mettu, svipað og Margrét Lára (Viðarsdóttir) gerði sumarið 2019 þegar Elín var fremst.“

„Þær eru auðvitað mjög ólíkar. Elín á það til að vera á stöðum sem hún á alls ekki að vera, en það getur að sama skapi verið hennar helsti kostur þar sem andstæðingurinn veit ekkert hvernig á að verjast henni. Hún tímasetur hlaup sín virkilega vel og elskar að keyra á vörn andstæðingsins.“

„Á sama tíma er Bryndís Arna meira í því að koma niður og fá boltann í fætur, góð að snúa og finna samherja í fáum snertingum. Hún er svo alltaf mætt í teiginn þegar það kemur fyrirgjöf og skorar þannig það sem flokka mætti sem „auðveld“ mörk,“ sagði Eiður að endingu.

Það verður áhugavert að sjá hvað Íslandsmeistararnir bjóða upp í sumar en eins og áður sagði fór liðið mikinn í riðlakeppni Lengjubikarsins áður en sóknarleikurinn hrökk í baklás. Fram að því höfðu þær Ída Marín Hermannsdóttir og Ásdís Karen Halldórsdóttir þanið netmöskvana nokkuð reglulega og ljóst að Pétur hefur úr mörgum vopnum að velja í sumar.

Besta deild kvenna hefst á tveimur leikjum þann 26. apríl. Leikur Vals og Þróttar Reykjavíkur verður sýndur beint á Stöð 2 Sport 4 en allir leikir deildarinnar verða aðgengilegir í vefsjónvarpi Stöðvar 2.