Örlítill munur en Víkingum spáð titlinum

Spáin var kynnt á kynningarfundi ÍTF í dag. Því er spáð að Víkingar verji Íslandsmeistaratitil sinn en þeir fengu 367 stig í spánni, aðeins þremur stigum meira en Breiðablik sem spáð er 2. sæti.

Valsmönnum er svo spáð 3. sætinu sem getur mögulega gefið þáttökurétt í Evrópukeppni.

KR, FH og Stjarnan munu svo einnig vera með í hópi sex efstu liðanna sem spila í efri hlutanum þegar deildinni verður skipt að loknum 22 umferðum, samkvæmt spánni.

Nýliðar Fram fengu afgerandi kosningu í neðsta sæti deildarinnar en Keflavík er einnig spáð falli á meðan að nýliðar ÍBV halda sér uppi samkvæmt spánni.