Eitt fyrsta verk Svandísar að liðka fyrir veiðum á loðnu

Þessi ákvörðun Svandísar var eitt fyrsta verk hennar í nýju ráðuneyti, að sögn Ástu Sigrúnar Magnúsdóttur, upplýsingafulltrúa ráðuneytisins. Samkvæmt bráðabirgðaákvæði ber skipstjórum sem stunda veiðar á svæðunum að tilkynna það Fiskistofu eigi síðar en einum virkum degi fyrir upphaf veiða og að taka um borð eftirlitsmann, samkvæmt nánari tilmælum frá Fiskistofu.

Þrjár vikur eru frá því fyrstu veiðiskipin héldu til loðnuveiða. Skipstjórar hafa séð talsvert af loðnu en hvorki hefur gengið né rekið að veiða hana. Ýmist hefur bræla hamlað veiðum en auk þess hefur loðnan verið á of miklu dýpi til að loðnunætur skipanna nái henni. 

Skipstjórar hafa því verið að þrýsta á að fá nota troll, veiðarfæri sem nær dýpra, á umræddum svæðum úti fyrir Norðurlandi. Loðnuveiðar með trolli hafa hins vegar verið leyfðar austan við Langanes en ekki vestan við lengdarbaug 14'30, þar til nú, með reglugerðarbreytingu Svandísar. Hún heimilar trollveiðar allt vestur að 18 lengdargráðu, sem liggur um Grímsey.

Í frétt á heimasíðu Síldarvinnslunnar í dag kemur fram í viðtali við Hálfdán Hálfdánarson, skipstjóra á Berki, sem staddur er úti fyrir Norðurlandi, að þar hafi menn beðið eftir því að fá leyfi til að nota troll.

„Við erum hérna í blíðviðri og það er töluvert af loðnu að sjá. Það er hins vegar ekki unnt að veiða hana í nót því hún stendur of djúpt. Loðnan þar sem við erum staddir núna er á 230 metrum. Hér væri örugglega hægt að ná góðum árangri í troll,“ er haft eftir Hálfdáni.

„Við köstuðum einu sinni í fyrrinótt og fengum þá um 10 tonn. Sú loðna var fín og falleg, 43 stykki í kílóinu. Það eru hérna sex bátar að fylgjast með loðnunni en það kastaði einungis einn í nótt með engum árangri. Það var Heimaey,“ segir skipstjórinn á heimasíðu SVN.

Hér má sjá frétt Stöðvar 2 þegar fyrsta skipið bjó sig til loðnuveiða þann 8. nóvember: