Tvö hundruð Hagskælingar nema á Hótel Sögu

Eva Bergþóra Guðbergsdóttir, teymisstjóri samskiptasviðs Reykjavíkurborgar, segir að stjórnendur og aðrir starfsmenn hafi verið að undirbúa húsnæðið yfir helgina. Þar hefst nám hjá 8. bekkingum í dag.

Skólastjórnendum Hagaskóla bárust í október ábendingar um að tilefni væri til að kanna loftgæði í norðausturálmu skólans og var þá kallað eftir aðstoð sérfræðinga til að rannsaka húsnæðið.

Tekin voru sýni úr gólfi og múr og loftræstikerfi hreinsað og tekið út. Frumniðurstöður frá verkfræðistofunni Eflu bárust miðvikudaginn 17. nóvember og kom þar fram að einhver leki hefði átt sér stað í múrvegg hvar fannst mygla.

„Unnið er samkvæmt nýjum verkferlum sem fara í gang um leið og grunur beinist að rakaskemmdum eða myglu og voru niðurstöðurnar strax kynntar fyrir stjórnendum og starfsfólki. Ákveðið var að engin kennsla myndi fara fram í þessum hluta húsnæðisins þar til endurbætur hafa farið fram,“ sagði í tilkynningu frá Reykjavíkurborg í síðustu viku.

Nemendur í 8. bekk fóru í vettvangsferðir á söfn á föstudaginn en mæta nú í skólann á Hótel Sögu.