Vitnis­burður Car­menar og Lauf­eyjar talinn ó­sam­rýman­legur

Leiddi þetta til þess að Jón Baldvin, fyrrverandi ráðherra og sendiherra, var sýknaður af ákæru um kynferðislega áreitni og miskabótakröfu Carmenar vísað frá dómi. Dómurinn var kveðinn upp í Héraðsdómi Reykjavíkur í morgun en héraðssaksóknari fór fram á Jón Baldvin yrði dæmdur í tveggja til þriggja mánaða skilorðsbundið fangelsi og gert að greiða allan sakarkostnað. Ekki hefur verið tekin ákvörðun um hvort niðurstöðunni verði áfrýjað.

Jón Baldvin hefur ætíð neitað sök en atvikið á að hafa átt sér stað þann 16. júní 2018 á heimili Jóns Baldvins og eiginkonu hans Bryndísar Schram í Grananda á Spáni. Viðstöddum ber ekki saman um hvað gerðist umrætt kvöld en að sögn Carmenar og Laufeyjar Óskar káfaði Jón Baldvin á rassi þeirrar fyrrnefndu utanklæða við borðhaldið.

Fimm vitni til frásagnar

Jón Baldvin var fyrst ákærður í tengslum við málið árið 2019 en síðan hefur málinu endurtekið verið vísað frá í héraði og sent aftur heim í hérað úr Landsrétti.

Auk Jóns Baldvins voru fjögur vitni til frásagnar um það sem gerðist umrætt kvöld. Að sögn héraðsdóms fékk framburður Jóns Baldvins stoð í vitnisburði Bryndísar en vitnisburður Laufeyjar Óskar var ekki talinn styðja nógu vel við framburð Carmenar.

Laufey Ósk lýsti atburðum svo að þegar allir voru sestir til borðs hefði Carmen staðið upp, sótt vínflösku, og er hún stóð hægra megin við Jón Baldvin að skenkja í glösin hefði hann teygt höndina upp eftir lærinu á Carmen.

Þegar Laufey var spurð við aðalmeðferð málsins hvort Carmen hefði verið að hella í glas Laufeyjar kvaðst hún ekki vera viss hvort verið var að hella í glasið hennar eða í glas Hugrúnar Auðar Jónsdóttur, sem var sömuleiðis viðstödd kvöldverðinn. Spurð um þetta fyrir dómi kvaðst Carmen ekki geta svarað þessu og vísaði á móður sína.

Nánar spurð um lýsingu á því hvernig ákærði strauk Carmen kvaðst Laufey ekki geta það þar sem hún myndi það ekki. Laufey taldi þó að Jón Baldvin hafi strokið rassinn upp og niður og minnti að Carmen hafi verið í buxum.

Þetta kemur fram í úrskurði héraðsdóms en síðar í vitnisburðinum fyrir dómi sagði Laufey Ósk að Carmen hefði ekki verið að hella í glas sitt þegar atburðurinn átti sér stað en hún kynni að hafa verið nýbúin að gera það. Nánar spurð um þetta kvaðst Laufey halda sig við vitnisburð sinn hjá lögreglu þar sem hún myndi þetta ekki svo glöggt í dag.

Talið ósannað að Jón Baldvin hafi framið háttsemina

Fram kemur í niðurstöðu héraðsdóms að Laufey hafi lýst atburðum nokkuð á annan veg í skýrslutöku hjá lögreglu. Við skýrslutöku þann 10. apríl 2019 greindi Laufey Ósk frá atburðinum á þennan hátt: „Ég man ekki hvort hann fór inn í klofið á henni, eða hvort hann, hérna byrjaði þar, eða fór upp, eða byrjaði upp og fór niður í klofið á henni, skilurðu, eða aftan á rassinn og inn í klofið á henni, en þannig var það, hvað hann gerði það oft, ætli það hafi ekki verið svona þrisvar sinnum, eitthvað svona þrisvar, já.“ 

Í skýrslutöku hjá lögreglunni sama dag sagði Laufey Ósk einnig: ,,meðan hún er að hérna að skenkja í glasið hjá mér, þá hérna sé ég það að hann tekur hægri höndina og fer með hana bara á rassinn á henni og strýkur henni upp og niður.“

Carmen kvað Jón Baldvin hafa byrjað að strjúka á henni rassinn mjög ákaft meðan hún hellti í glösin einu sinni upp og niður og kvaðst hafa verið í kjól. Líkt og áður kom fram minnti Laufey, þegar hún var spurð hvort Jón Baldvin hafi farið undir fötin, að Carmen hafi verið í buxum. 

Talið ósannað að hann hafi framið háttsemina

Fram kemur í niðurstöðu héraðsdóms að ráða megi af vitnisburði Laufeyjar Óskar fyrir dómi að hún muni atburði ekki vel. Þá hafi hún staðið við vitnisburð sinn hjá lögreglu en þar sé atburðum lýst á nokkuð annan hátt en Carmen gerir. 

„Vitnisburður þessara tveggja vitna er um sumt ósamrýmanlegur, til dæmis um það hvernig þær lýsa háttsemi ákærða og fleira,“ segir í dómi héraðsdóms.

Hugrún Auður, vinkona Jóns Baldvins og Bryndísar sem var viðstödd kvöldverðinn, sagðist ekki hafa séð Jón Baldvin áreita Carmen.

„Vitnisburður Carmenar fær því hvorki þá stoð sem þarf af öðrum vitnisburði né af öðrum gögnum málsins til að unnt sé að leggja hann til grundvallar niðurstöðunni, gegn neitun ákærða, en neitun hans fær stoð í vitnisburði Bryndísar og Hugrúnar Auðar,“ segir í dómi héraðsdóms.

Taldi Guðjón St. Marteinsson, dómari í málinu, því ósannað gegn neitun Jóns Baldvins, að hann hafi framið háttsemina sem greint er frá í ákæru og því bæri að sýkna hann.

Miskabótakröfu Carmenar var vísað frá dómi og greiðist allur sakarkostnaður úr ríkissjóði.