Kynþáttaníð, grímuleysi og dróni truflaði þjóðsöng

Reuters greinir frá þessu og segir að Ungverjar hafi fengið mestu refsinguna en þeir eru á meðal fjölda þjóða sem fengið hafa einhvers konar áhorfendabann. Um er að ræða refsingar vegna hegðunar á landsleikjum karla.

Ungverjar voru skikkaðir til að spila tvo heimaleiki án áhorfenda, seinni leikurinn er þó skilorðsbundinn, og mega ekki mæta á næsta útileik landsliðs síns. Þeir hlutu refsinguna vegna kynþáttaníðs stuðningsmanna og vegna þess að reyksprengjur sprungu og stigagangar stífluðust á leikjum við England og Andorra.

Ungverska knattspyrnusambandið fékk auk þess sektir sem samtals nema 281.000 svissneskum frönkum, eða tæplega 40 milljónum íslenskra króna.

Albanía, Mexíkó og Panama þurfa einnig að spila heimaleiki fyrir luktum dyrum og Pólverjar mega ekki hafa stuðningsmenn á einum útileik.

Þá þurfa Argentína, Síle, El Salvador, Hondúras, Svartfjallaland og Perú öll að spila leiki fyrir framan „takmarkaðan fjölda áhorfenda“.

Of mörg gul spjöld

Knattspyrnusamband Andorra var eitt af sex samböndum sem fengu sekt út af of mörgum gulum spjöldum. Andorramenn fengu sex gul spjöld í leik gegn Englandi.

Frakkar fengu tæplega 300.000 króna sekt út af því að áhorfendur voru ekki með grímur þegar þeir gerðu 1-1 jafntefli við Bosníu í Strassborg í september.

Dróni truflaði þjóðsöng

Knattspyrnusambandi Kasakstan var refsað vegna fána stuðningsmanna sem tileinkaður var sovéskum hermönnum úr seinni heimsstyrjöldinni sem börðust fyrir nasista.

Moldóvar fengu hins vegar sekt vegna þess að dróni truflaði þjóðsöngvana fyrir leik gegn Austurríki.