Þúsundir íbúða í pípunum í Reykjavík

Árleg kynning Reykjavíkurborgar á uppbyggingu íbúða í borginni til lengri og skemmri tíma fór fram í Ráðhúsinu í dag. Samkvæmt henni mun borgin taka miklum breytingum á næstu fimm til tíu árum.

Ártúnshöfðinn hefur verið mikið iðnaðarhverfi á undanförnum áratugum með alls kyns starfsemi. Á því verða breytingar á allra næstu árum. Á höfðanum sem mun kallast Borgarhöfði munu rísa um þrjú þúsund og fimm hundruð íbúðir og samanlagt á höfðanum og í Elliðaárdalnum um átta þúsund íbúðir.

Þegar það allt verður búið mun þetta svæði líta út eins og sést á myndbandinu hér fyrir neðan.

Dagur B. Eggertsson borgarstjóri segir borgina nýlega hafa samþykkt aðalskipulag til ársins 2040. Í því væri gert ráð fyrir yfir tuttugu og fimm þúsund íbúðum.

„Til viðmiðunar þá er núverandi íbúðafjöldi í allri Reykjavík um fimmtíu og fimm þúsund íbúðir. Þannig að þetta er á við helminginn af því sem þegar hefur verið byggt á síðustu hundrað árum sem hægt er að fara í á næstu tveimur áratugum,“ segir Dagur.

En á allra næstu mánuðum og árum muni íbúðum í borginni einnig fjölga umtalsvert.

„Það eru tvö þúsund og sjö hundruð þegar í byggingu. Það eru þrjú þúsund til viðbótar í samþykktu deiliskipulagi. Síðan erum við að fara út með þúsund lóðir á næsta ári auk þess að samþiggja ný hverfi. Þannig að þetta er mjög umfangsmikið magn og ég treysti mér til að fullyrða að það muni ekki standa á Reykjavík,“ segir borgarstjóri.

Í dag stendur yfir mikil uppbygging á fjölmörgum stöðum í borginni eins og í nýju Vogahverfi og í Ánanaustum þar sem þegar er byrjað að byggja um tvö hundruð íbúðir. Þannig mætti lengi telja uppbyggingu í Árbæ, á Kirkjusandi, Hlíðarenda og framundan er mikil uppbygging á grænu hverfi í Skerjafirði.

Dagur segir borgina leggja áherslu á að byggt sé fyrir alla tekjuhópa í blönduðum hverfum.

„Við tökum frá lóðir og byggingarrétt fyrir þá sem hafa minni efni. Það er hvergi annars staðar byggt eins mikið af félagslegu húsnæði. Það er hvergi byggt eins mikið af leiguhúsnæði á viðráðanlegu verði. Við viljum að allir hafi öruggt þak yfir höfuðið. Þess vegna er fjórðungur alls sem er að fara af stað á vegum óhagnaðardrifinna félaga,“ segir Dagur B. Eggertsson.