Hlaupið í Skaftá virðist hafa náð hámarki við Sveinstind og er flóðtoppurinn nokkru lægri en spáð var. Hættustig er enn í gildi og við fáum nýjustu tíðindi frá Veðurstofunni í beinni útsendingu.
Talibanar hafa skipað nýja ríkisstjórn í Afganistan. Leiðtogi ríkisstjórnarinnar er einn stofnanda Talibana sem er á svörtum lista Sameinuðu þjóðanna. Nýja ríkisstjórnin var kynnt aðeins klukkustundum eftir að Talibanar skutu á mótmælendur í höfuðborginni Kabúl. Fjallað verður nánar um málið í kvöldfréttum.
Ríkisstjórnin héldi velli og Miðflokkurinn næði ekki inn manni samkvæmt nýrri Maskínukönnun. Við rýnum í könnunina og skoðum möguleg stjórnarmynstur.
Þá heyrum við í bæjarstjóra Hveragerðisbæjar um fólksfjölgun í bænum, sjáum frá upphafi sláturtíðar á Suðurlandi og skoðum framkvæmdir á Eskifirði sem munu breyta ásýnd bæjarfélagsins.
Þetta og margt fleira á samtengdum rásum Bylgjunnar og Stöðvar 2 klukkan 18:30.
