Sjáðu glæsimark Gísla og þrennu Jónatans Inga í Keflavík

Breiðablik vann 2-0 sigur á KA í gærkvöld en sigurinn er þeim gríðarmikilvægur. Blikar eru nú aðeins einu stigi frá toppliði Vals í töflunni en KA-menn eru í fjórða sæti, fjórum stigum frá Breiðabliki.

Gísli Eyjólfsson skoraði fyrra mark leiksins þar sem hann þrumaði boltanum í slá og inn eftir hörkusprett inn á teig KA-manna á 19. mínútu. Blikar fengu fjölmörg tækifæri til að bæta við en það var ekki fyrr en á 73. mínútu sem Viktor Karl Einarsson innsiglaði 2-0 sigur þeirra.

Í Keflavík vann FH öruggan 5-0 sigur á Keflvíkingum. Baldur Logi Guðlaugsson skoraði fyrsta mark leiksins í uppbótartíma fyrri hálfleiks eftir stoðsendingu Jónatans Inga Jónssonar. Jónatan skoraði svo þrennu í síðari hálfleiknum og lagði upp mark fyrir Oliver Heiðarsson að auki.

Eftir sigurinn er FH með 25 stig í sjötta sæti en Keflavík er með 17 stig í áttunda sæti, fjórum stigum frá fallsæti.

Mörkin úr sigri Breiðabliks má sjá að ofan en úr stórsigri FH-inga hér að neðan.

Einn leikur er á dagskrá í Pepsi Max-deild karla í dag. Víkingur fær Val í heimsókn klukkan 19:15 í leik sem mun líkast til hafa mikið að segja í toppbaráttunni. Valur er með 36 stig á toppnum en Víkingur með 33 stig í þriðja sæti.

Bein útsending hefst klukkan 18:45 á Stöð 2 Sport.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.